Álem chempıony Arýjan Zeınýllaevaǵa aýyldastary at mingizip, qurmet kórsetti
TALDYQORǴAN. KAZINFORM – Álem chempıonatynan altyn medal alǵan 17 jastaǵy qazaqstandyq boksshy Arýjan Zeınýllaeva men jattyqtyrýshysyna aýyldastary qurmet kórsetip, tulpar mingizdi.
«Bári ózimizdiń baýyrlarymyz, aǵalarymyz, aýyldastarymyz. Osylaı aýylǵa shaqyryp, as berip, toı qylyp jatyr. Qyzymyzdy qurmettep, at mingizdi. Barlyǵyna alǵysym sheksiz. Rızamyz. Arýjannyń jattyqtyrýshysy Jangeldi Ahmetovke de rızashylyǵymdy bildiremin», - dedi Arýjannyń ákesi Shalqar Ahmetbekov.
Aıta keteıik, Arýjan 27 qazan men 3 qarasha aralyǵynda Chernogorııanyń Býdvada qalasynda ótken bokstan jastar arasyndaǵy álem chempıonatynyń altyn júldesin ıelengen bolatyn. Ol 81 keli salmaqta fınalda ózbekstandyq Rýhshon Parpıevamen judyryqtasyp, 5:0 esebimen jeńiske jetken edi. Týrnırde Qazaqstan quramasy 6 altyn, 1 kúmis, 10 qola alyp, jalpykomandalyq esepte birinshi oryn aldy.
Eske salaıyq buǵan deıin 13 jasar Snejana Kashkarova aýyr atletıkadan sensatsııa jasaǵanyn jazǵanbyz.
