Álem chempıondary Astanaǵa oraldy: Halyq qoshemetpen qarsy aldy
ASTANA. KAZINFORM — Búgin Qazaqstan astanasyna bokstan álem chempıondary Sanjar Táshkenbaı men Aıbek Oralbaı, sondaı-aq ulttyq quramanyń bas bapkeri Qaırat Sátjanov kelip jetti, dep habarlaıdy Kazinform tilshisi.
Áýejaıda sportshylardy olardyń otbasylary, dostary men jankúıerleri kútip aldy. Qýanyshqa toly kezdesý bir jarym saǵattan astam ýaqytqa sozyldy: jankúıerler boksshylardy quttyqtap, sýretke túsip, tilekterin arnady.
Ulttyq quramanyń bas bapkeri Qaırat Sátjanov aldaǵy ýaqytta komanda aqpan aıynda ótetin Álem kýbogynyń sheshýshi kezeńine daıyndalatynyn atap ótti. Sonymen qatar, ol chempıonattaǵy tóreshiler jumysyna da nazar aýdardy.
— Birneshe sát boldy, qandaı jaǵdaı bolsa da bizdiń boksshylar qarsylastarynan bir saty joǵary óner kórsetti. Olar jeńiske jetý úshin bar kúshin saldy. Ýaqyt óte kele barlyǵy retke keledi, — dedi ol.
Álem chempıony Sanjar Táshkenbaı týrnırdiń ózi úshin josparǵa saı ótkenin aıtty.
— Men tájirıbeli sportshymyn, halyqaralyq arenada alǵash ret óner kórsetip otyrǵan joqpyn. Bul jerde eń bastysy — bapkerlerdi tyńdaý, tek fızıkalyq emes, psıhologııalyq daıyndyq ta mańyzdy boldy. Bapkerlerdiń barlyq tapsyrmasyn oryndaýǵa tyrystym. Jalpy, bári biz josparlaǵandaı ótti, — dedi chempıon.
Aıbek Oralbaı fınalda ózbekstandyq qarsylasymen bolǵan jekpe-jekte sheshýshi sát sońǵy raýndta bolǵanyn aıtty.
— Sońǵy raýnd eń qıyn kezeń boldy. Biraq dál sol kezde ózimdi tolyq jınap, bar kúshimdi saldym. Qarsylasymnyń sharshaǵanyn kórip, basymdyq tanytý kerektigin túsindim. Sońynda bul maǵan jeńis ákeldi, — dedi sportshy.
Ulttyq quramanyń kapıtany retinde ol komanda rýhyn joǵary deńgeıde ustaýdyń mańyzdy ekenin de atap ótti.
— Shynymdy aıtsam, Olımpıadadan keıin álem chempıonaty qarapaıym týrnır sekildi seziledi. Sebebi eki jarystyń atmosferasy múlde bólek. Biz — men, inim Nurbek, Sanjar, Mahmud tórteýimiz – bul jarysqa tek jeńemiz degen maqsatpen bardyq. Iá, inimniń joly bolmady, biraq meniń oıymsha, Nurbektiń jeńisi áli alda. Ol maǵan senedi, men oǵan senemin, — dedi chempıon.
Chempıondardyń Astanaǵa oralýy jankúıerler men týystary úshin naǵyz merekege aınaldy. Olar sportshylardy ulttyq týlarmen, gúldermen jáne ystyq qoshemetpen qarsy aldy.
Budan buryn Lıverpýlde ótken bokstan álem chempıonatynan oralǵan Qazaqstannyń áıelder quramasyn Almaty áýejaıynda saltanatty túrde qarsy alǵanyn jazǵan edik.