Álem chempıonatynyń «kúmisi» laıyqty nátıje - Dınara Sádýaqasova

ALMATY. QazAqparat - Qazaqstandyq shahmatshy, Almatyda rapıd boıynsha áıelder arasyndaǵy álem chempıonatynyń kúmis júldegeri Dınara Sádýaqasova óziniń jeńisi týraly pikir bildirdi, dep habarlaıdy QazAqparat tilshisi.

«Týrnırdiń vıtse-chempıony atanǵanymdy qýana súıinshileımin. Men Qytaı, Úndistan, Reseı jáne basqa da dástúrli shahmat elderiniń namysyn qorǵaıtyn álemniń úzdik sportshylarymen oınaýǵa múmkindik aldym. Jarys qıyn ári tartysty ótti. Týrnır qashyqtyǵy – 11 oıynnan keıin men jáne Qytaıdan shyqqan burynǵy Álem chempıony Tan Chjýnı teń upaı jınadyq. Al taı-breıktiń sońynda men odan jeńilip qaldym. Bir jyl boıy alańǵa shyqpaǵanymdy eskersek, álem chempıonatynyń «kúmisi» laıyqty nátıje dep esepteımin», - dep jazdy Dınara Sádýaqasova óziniń Instagram- daǵy paraqshasynda.

Eske salsaq, Almaty qalasynda shahmattan ótip jatqan álem chempıonatynda qazaqstandyq Dınara Sádýaqasova rapıdten kúmis júldeger atandy.

Osy jeńisimen Dınarany Memleket basshysy Qasym-Jomart Toqaev quttyqtady.

Aıta keteıik, shahmattan 2022 jylǵy álem chempıonaty Almatyda 25 jeltoqsan kúni bastaldy. Jahandyq dodaǵa 50 eldiń úzdik 290 shahmatshysy qatysyp jatyr.