Álem chempıonatynyń kúmis júldegeri Serik Temirjanovqa Pavlodardan páter berildi

PAVLODAR. QazAqparat - Bokstan álem chempıonatynyń kúmis júldegeri Serik Temirjanovqa páter kilti tabystaldy, dep habarlaıdy QazAqparat.

Álemdik birinshilikte Qazaqstannyń dańqyn asyrǵan sportshyny Pavlodar oblysynyń ákimi Ábilqaıyr Sqaqov quttyqtady.

Boksshyǵa arnaǵan sózinde aımaq basshysy jerlesimizdiń Serbııada ótken álem chempıonatyndaǵy barlyq jekpe-jegin kórgenin atap ótti.

- Seniń «kúmisiń» ulttyq quramanyń qorjynyna qomaqty úles qosty, - dedi Ábilqaıyr Sqaqov. - Aıta ketý kerek, bul pavlodarlyqtardyń bokstan erler arasyndaǵy álem chempıonattarynda jeńip alǵan alǵashqy medali. Osy marapattyń arqasynda jerlesimiz pavlodarlyqtar arasynda birinshi bolyp Qazaqstan Respýblıkasynyń bokstan eńbek sińirgen sport sheberi atanǵany kóńilimizdi odan saıyn kóterdi. Dál osy joǵary jetistikpen shyn júrekten quttyqtaımyn. Jattyqtyrýshylaryńmen birge jańa belesterdi baǵyndyryp, sonyń ishinde jazǵy Olımpıadada jeńiske jetedi dep senemin.

Halyqaralyq arenada úzdik óner kórsetkeni úshin marapat retinde sportshyǵa páter kiltteri tabystaldy.

Boksshy barlyq jerlesterine qoldaý kórsetkeni úshin alǵys aıtyp, aldaǵy ýaqytta iri jarystardyń «altynyn» alý úshin bar kúshin jumsaýǵa ýáde berdi.

- Olımpıadadan keıin biz kóp eńbek ettik jáne álemdik týrnırde jaqsy óner kórsettik dep oılaımyn, - dedi Serik Temirjanov. - Men munymen toqtap qalmaımyn. Bolashaqta kúmis medaldi altynǵa aınaldyrǵym keledi. Bizdi qoldaǵan barlyq jandarǵa alǵys aıtamyn.

Kezdesý barysynda sportshynyń tálimgeri Azamat Maqajanov ta sóz sóıledi. Ol jattyqtyrýshy rólinde ózi rıngte óner kórsetkennen áldeqaıda kóp tájirıbe alǵanyn moıyndady.

- Biz der kezinde úlgerdik, óıtkeni bizdiń sportshynyń álem chempıonatyna qatysý-qatyspaýy ekitalaı edi, - dep moıyndady Azamat Maqajanov. - Biraq Serik ózine tán sabyrlylyqpen judyryqtasyp, ulttyq quramadaǵy sparrıngter kezinde jaqsy nátıje kórsetti. Sol kezde Baqtııar Artaev (bokstan Qazaqstannyń memlekettik jattyqtyrýshysy - esk.) «Týrnırge daıyndalyńdar, biraq sizderden tek jeńis kútemiz» - dedi. Biz bul mindetti oryndadyq.

Aıta keteıik, Belgradta ótken bokstan álem chempıonatynda Serik Temirjanov 57 kelige deıingi salmaq dárejesinde elimizdiń namysyn qorǵady.

Fınalǵa jeter jolda ol Mońǵolııa, Japonııa, Úndistan, Reseı jáne Kýbadan kelgen ataqty boksshylardy utty.

Fınalda pavlodarlyq sportshy amerıkalyq Djamal Harvıge ese jiberip aldy.

Sýretterdi túsirgen Valerıı Býgaev