Álem chempıonatynyń kúmis júldegeri Nurıslam Sanaevqa páter berildi
AQTÓBE. QazAqparat - Álem chempıonatynan júldemen oralǵan Nurıslam Sanaevqa búgin 2 bólmeli páterdiń kilti tapsyryldy, dep habarlaıdy QazAqparat tilshisi.
Aqtóbe oblysynyń ákimi Berdibek Saparbaev erkin kúres balýany, 2018 jylǵy álem chempıonatynyń kúmis júldegeri Nurıslam Sanaevpen kezdesip, jeńisimen quttyqtady.
"Biz Býdapeshtte ótken Álem chempıonatyndaǵy jetistigińdi maqtan tutamyz. Bul elimiz úshin tarıhı oqıǵa. Elbasy saıasatynyń arqasynda halyqty dene shynyqtyrýmen jáne sportpen qamtý artyp, sport nysandary qoljetimdi bolyp keledi. Sportshylardyń jetistigi jas urpaqtyń salaýatty ómir saltyn tańdaýyna septigin tıgizedi", - dedi óńir basshysy Berdibek Saparbaev.
Kezdesý kezinde oblystyq grek-rım, erkin jáne áıelder kúresi federatsııasynyń atynan Aqtóbe qalasynyń Batys-2 turǵyn úı alabynan eki bólmeli páterdiń sertıfıkatyn tabys etti. 
Eske salsaq, Nurıslam Sanaev olımpıadalyq salmaqta Álem chempıonatynyń kúmis júldesin jeńip alǵan Qazaqstannan shyqqan alǵashqy erkin kúres balýany atandy. Ol 2020 jyly Tokıoda ótetin XXXII jazǵy Olımpıada oıyndaryna qatysýǵa nıetti.
