Álem chempıonatynda jaǵymsyz shý estilmeıtin bolady
ASTANA. 30 qarasha. QazAqparat - Keler jylǵy álem chempıonatynda fýtbol jankúıerleri qoldanatyn kashırola aspabynyń daýysy qulaqqa qaýipsiz. Brazılııanyń Santa-Marııa federaldyq ýnıversıtetiniń ǵalymdary kashırolanyń vývýzeladan artyqshylyǵyn anyqtady, dep habarlady alashainasy.kz.
Lenta.ru-dyń habarlaýynsha, zertteýdiń nátıjesinde brazılııalyqtardyń ulttyq mýzykalyq aspaby úniniń vývýzelaǵa qaraǵanda 45 detsıbelge tynysh ekeni belgili boldy. Ǵalymdar kashırola ustaǵan jankúıerlerge toly stadıonnyń úshólshemdi kompıýterlik modelin jasap, aspaptyń ár jerden jarysa shyǵatyn daýsynyń estý qabiletine qalaı áser etetinin jáne bir tekserdi. Dybys qattylyǵy qulaqqa zııanyn tıgizbeıtin bolyp shyqty. 2010 jylǵy álem chempıonaty kezinde ońtústikafrıkalyq vývýzela aspabynyń daýsyna qatysty kóp shaǵym aıtylǵan edi. Budan soń ony fýtbol saıystarynda qoldanýǵa tyıym salyndy. Bıyl Brazılııa bıligi jankúıerlerge vývýzela ornyna kashırola aspabyn qoldanýdy usyndy. Vývýzela ysqyryq bolsa, kashırola - soqpaly syńǵyrlaq aspap. Álem chempıonaty bul elde keler jyly 12 maýsym men 13 shilde aralyǵynda ótedi.
