Álem chempıonatynda tórtinshi boksshymyz jarystan shyǵyp qaldy
ASTANA. QazAqparat - Bokstan Germanııanyń Gambýrg qalasynda ótip jatqan álem chempıonatynda taǵy bir qazaqstandyq boksshy jarys jolyn aıaqtady, dep habarlaıdy QazAqparat tilshisi.
Qazaqtyń «salmaǵy» atanyp ketken 69 keli salmaqta synǵa túsken Abylaıhan Júsipov shırek fınalda ıtalııalyq qarsylasyna jol berdi.
Úshinshi raýndta otandasymyzdyń jaraqat alýyna baılanysty tóreshi jekpe-jekti toqtatyp, ary qaraı jalǵastyrýǵa jol bermedi. Osylaısha jeńis qarsylasy Vınchentso Madjakpereniń qanjyǵasyna baılandy.
Aıta keteıik, 27 tamyz kúni Álem chempıonatynda aıqastaryn ótkizgen 4 sportshymyz - Ábilhan Amanqul (75 kelige deıin), Jomart Erjan (49 keli), Qaırat Eralıev (56 keli) pen Vasılıı Levıt (91 kelige deıin) qarsylastaryn jeńip, shırek fınalǵa ótti.
29 tamyzda Jomart reseılik Vasılıı Egorovpen, Qaırat nemis Omar El-Hagpen, Ábilhan kýbalyq Arlen Lopespen, Vasılıı avstralııalyq Djeıson Ýotelımen qolǵap túıistiredi.
Al osyǵan deıin úsh sportshymyz - Azamat Isaqulov (52 keli) pen Ádilet Qurmetov (60 keli) pen Bekdáýlet Ibragımov (64 kelige deıin) týrnırdegi jarysyn aıaqtady.
25 tamyzda bastalǵan Bokstan álem chempıonaty toǵyz kúnge jalǵasyp, 2 qyrkúıek kúni márege jetedi.
