Álem chempıonatynda taǵy bir qazaq boksshysy fınalǵa joldama aldy
ASTANA. QazAqparat - Bokstan álem chempıonatynda 75 kelige deıingi salmaqta qolǵap túıistirgen qazaq boksshysy, Taraz óńiriniń týmasy Ábilhan Amanqul ázerbaıjandyq boksshy Kamran Shabshýraglýdy jartylaı fınalda jeńdi, dep habarlaıdy «QazAqparat» HAA tilshisi.
Alǵashqy raýnd qos boksshy úshin teń dárejede órbidi. Shıelenisti jekpe-jekte naqty ekeýdiń bireýi alǵa shyqty deıtindeı emes - ózara soqqy almasý boldy. Kamran bizdiń eldiń boks mektebiniń mánerin bilgendikten be, aýyr soqqylarǵa laıyqty jaýap berip júrdi. Alaıda ekinshi raýndtyń sońyndaǵy Ábilhannyń basymdyǵy aıqyndala túsken edi. Kúptegen soqqylar Kamrandy eseńgirete tústi. Biraq ázerbaıjandyq sońyna deıin janyn salyp baqty. Tóreshilerdiń sheshimimen Ábilhan 4:1 jeńiske jetti.
Aıta ketý kerek, ázerbaıjandyq Kamran Shabshýraglý Aqtóbe oblysynyń týmasy. Keıin Ázirbaıjanǵa kóship ketken. Qazirgi ýaqytta sol eldiń namysyn qorǵap júr. Al Ábilhan Amanqul olımpıada chempıony, Vel Barker kýbogynyń ıegeri Bahtııar Artaevtyń aýyldasy.
Eske sala ketsek, Germanııa eliniń Gambýrg qalasynda bokstan ótip jatqan álem chempıonatynda qazaqstandyq Qaırat Eralıev (56 kelige deıingi salmaq) fınalǵa joldama alsa, 49 kelige deıingi salmaqta Jomart Erjan qola júldeni qanaǵat tutty. Buǵan qosa taǵy úsh boksshymyz jartylaı fınalǵa joldama alyp otyr.
