Álem chempıonatynda qazaqtyń qarshadaı qyzy óz tobynda úzdik nátıje kórsetti
ASTANA. QazAqparat - Polshanyń Vrotslav qalasynda aýyr atletıkadan 20 jasqa deıingi jasóspirimder arasynda ótip jatqan álem chempıonatynda V tobynda óner kórsetken 17 jasar qazaqtyń qarshadaı qyzy Áıgerim Aýylbek (58 keli) birinshi orynǵa ıe boldy. Bul týraly QR Aýyr atletıka federatsııasynyń baspasóz qyzmeti habarlady.
Áıgerim alǵashqy jattyǵýda 79 kelini basynan asyra erkin kóterse, ekinshisinde 101 kelini ońaı baǵyndyryp, qos saıys qorytyndysy boıynsha jerlesimiz 180 keli kórsetkishpen óz tobynda eń úzdik sportshy ataǵyna qol jetkizdi.
Aıgerim buǵan deıin de ár túrli dodalarda elimizdiń namysyn abyroımen qorǵap keledi. Aıtalyq, ol osyǵan deıin jasóspirimder arasyndaǵy (17 jasqa deıin) Álem chempıonatynyń kúmis júldegeri, jasóspirimder arasyndaǵy Azııa chempıonatynyń kúmis júldegeri, Qazaqstan chempıony atanǵan.
Maýsymnyń 6-sy kúni jalaýy jelbiregen álemdik dodaǵa elimizden jalpy 4 sportshy attanǵan bolatyn. Áıgerimnen basqa, bul jarysta I Afro-Azııalyq chempıonattyń jáne III Azııa Kýbogynyń júldegeri, Qazaqstan chempıony Ekaterına Bykova (75 keli), jasóspirimder arasyndaǵy dúnıejúzilik talaı syndarda jasyndaı jarqyrap, álem rekordsmeni atanǵan Nadejda Nogaı (+75 keli) jáne jasóspirimder arasyndaǵy álem chempıonatynyń júldegeri Aıat Ámirbekov (85 keli) baq synaıdy.
Aıat jarys alańyna 10 maýsymda, Ekaterına 12 maýsymda, al Nadejda 13 maýsymda shyǵady.
Kúnsultan Otarbaı
