Álem chempıonatynda qazaqstandyq boksshy Oljas Súleımenov birinshi jekpe-jeginde jeńiske jetti
TANA. 28 qyrkúıek. QazAqparat - Bakýde ótip jatqan bokstan álem chempıonatynyń ekinshi kúngi saıystary 52 keli salmaq sanatyndaǵylardyń jekpe-jegimen bastaldy. Qazaqstandyq sportshy Oljas Súleımenov marokkandyq Abdelfattah Nafılmen qolǵap túıistirdi.
Jekpe-jektiń alǵashqy raýndy birin-biri baıqaý túrinde sylbyr bastalǵanymen, ekinshi mınýttan keıin Oljas belsendi qımylǵa kóship, raýndtyń sońyna qaraı soqqyny údetti, alaıda marokkandyq jaqsy qorǵana bildi. Sóıtip alǵashqy raýndy 1:0 esebimen Oljastyń az ǵana basymdyǵymen aıaqtaldy. Ekinshi raýndta boksshylar alma-kezek shabýylǵa shyqty. Bul jolǵy esep 6:4 bolyp, aıyrmashylyq ulǵaıa tústi. Sońǵy raýndta bizdiń boksshymyz qol jetken tabystaryn eseleı túsip, jalpy esep 14:7 bolyp, oıyn Oljastyń jeńisimen aıaqtaldy.
Búgin 81 keli salmaqtaǵy Ádilbek Nııazymbetov moldovalyq boksshy Vladımır Chelespen synǵa túsedi.
