Álem chempıonatynda qazaq sportshysy reseılikke jol berdi
ASTANA. QazAqparat - Astanada ótip jatqan MMA-dan Álem chempıonatynyń fınalynda Erkinbek Іnjeldiń (84 keli) reseılik sportshy Magomed Shaxrýdınovpen judyryqtasty, dep xabarlaıdy QazAqparat tilshisi.
Bul jekpe-jekte Erkinbek birinshi bolyp serııalyq soqqysyn daryta bildi. Al parterde óz qarsylasyn tunshyqtyryp kórdi. Degenmen, ózinen tórt jas úlken reseıliktiń tájirıbesi anyq baıqaldy. Shaxrýdınov tunshyqtyrý tásilinen shyǵyp qana qoımaı, Erkinbektiń qımylyn ábden orap tastady. Sóıtip júrip, óz soqqylaryn daryta bildi.
Ekinshi raýndta Erkinbek oń qolymen qarsylasynyń shabýylyn sheber tosa bildi. Alaıda ekeýi taǵy da parterge túsip qaldy. Bul joly reseılik sportshy qazaqtyń ústinen túspeı qoıdy. Erkinbek eki ret silkip kórdi. Biraq Shaxrýdınov óz basymdyǵyn bergen joq. Tóreshiler óz sheshimin reseıliktiń paıdasyna shyǵardy. Osylaısha, fınaldyq jekpe-jekterde reseılikterge qarsy shyqqan qazaqstandyq sportshylardyń barlyǵy utylyp qaldy.
Aıta keteıik, fınaldyń alǵashqy jekpe-jeginde qazaqstandyq Sanjar Ádilov (56,7 keli) tóreshiler sheshimimen jeńimpaz atanyp, chempıondyq belbeýdi ıelendi . Al Denıs Mýtsnık (65,8 keli) reseılik Abdýlmýtalıp Gaırbegovqa ese jiberip, kúmis júldeger atandy. Temirlan Ixsanǵalıev (77,1 keli) te reseılikten utylyp qaldy. Alda Qazaqstannyń taǵy bir sportshysy óner kórsetedi. Marııa Agapova (61,2 keli) belarýs Lılııa Kazakpen kúsh synasyp kórmek.
