Álem chempıonatynda hıdjabsyz óner kórsetken Iran shahmatshysy Ispanııaǵa qashýǵa májbúr
ASTANA. QazAqparat – 25 jastaǵy Sarasadat Hademalshareh bıyl 25-30 jeltoqsanda Almatyda ótken FIDE blıts-shahmattan álem chempıonatyna qatysqannan keıin Ispanııaǵa kóshýge májbúr.
Ol 2012 jyldan beri álemdegi eń perspektıvaly ırandyq shahmatshylardyń biri, dep habarlaıdy QazAqparat menshikti tilshisi EL PAÍS-ge silteme jasap.
Sportshy hıdjab dep atalatyn dástúrli oramalsyz oınaǵan. Musylman oramalynyń bolmaýy zańbuzýshylyq jáne ony Iran rejımi narazylyqty qoldaý dep esepteıdi.
Sportshy Irandaǵy otbasynyń qaýipsizdigine alańdaýly, sebebi birneshe sýretke hıdjabsyz túsken. EL PAÍS derekkózine sáıkes, shahmatshy otbasynyń Ispanııada páteri bar.
Sarasadat ırandyq shahmatshy Alıreza Fırýzııany (álemde 4-shi orynda, Frantsııaǵa kóshken, ızraıldik qarsylasymen oınaýǵa tyıym salynǵandyqtan jeńilip qaldy) qoldap, vıdeorolık joldady. Ol Iran úkimetiniń ızraıldiktermen oınaýǵa tyıym salý týraly zańnyń kúshin joıý keregin málimdegen bolatyn. Osydan soń el úkimeti shahmatshyǵa qysym kórsete bastaǵan.
Úsh jyl buryn Ispanııadaǵy Sunway Sitges shahmat festıvalinde Irannyń eki úzdik oıynshysy Parham Magsýdlý men Amın Tabatabaı 17 jastaǵy Ido Gorshteınnen jeńilip qalǵan edi. Iran úkimeti ashýlanyp, sportshylaryn tergeýge aldy. Olar qarsylasynyń ızraıldik ekenin bilmegenin aıtqan.
Iranda shahmat oınaýǵa 1989 jyly ruqsat etildi. Sodan beri shahmat damyp, ırandyq sportshylar júldeli oryndar alyp júr. Qazirgi tańda Iran Azııa óńirindegi uly shahmat derjavalarynyń biri bolyp sanalady.
Foto: LENNART OOTES/FIDE
