Álem chempıonatynda el namysyn qorǵaıtyn boksshylardyń tizimi anyqtaldy
ALMATY. 20 qyrkúıek. QazAqparat /Erlik Erjanuly/ - Qyrkúıektiń 22-si men 10-qazan aralyǵynda Ázirbaıjan astanasy Bakýde bokstan Álem chempıonaty ótedi.
2009 jyly Mılanda ótken sońǵy Álem chempıonatyna 133 elden 554 bylǵary qolǵap sheberi qatysqan edi. Halyqaralyq boksa qaýymdastyǵynyń habarlaýynsha, bıylǵy chempıonatqa qatysýshy elder men sportshylar sany óspese kemimeıdi. 2012 jyly Londonda ótetin Jazǵy Olımpıada oıyndarynyń alǵashqy irikteý jarysy sanalatyn bul dúbirli dodada 17-i men 34 jas aralyǵyndaǵy boksshylar 10 salmaq dárejesi boıynsha synǵa túsedi. Qazaqstan boks federatsııasynyń saıtynda jarııalǵan málimetke qaraǵanda, Myrzaǵalı Aıtjanov jattyqtyratyn Qazaqstan quramasy onda 9 salmaq dárejesi boıynsha baq synamaq. Bapkerler keńesi - astanalyq Danııar Eleýsinov (64 kg) pen Vasılıı Levıtke (91 kg), tarazdyq Oljas Sáttibaev (52 kg) pen Ǵanı Jaılaýovqa (60 kg) jáne ońtústik qazaqstandyq Birjan Jaqypov ( 49 kg) pen qaraǵandylyq Serik Sápıevke (69 kg), shyǵys qazaqstandyq Danabek Sýjanov (75 kg) pen aqtaýlyq Ádilbek Nııazymbetovke (81 kg), sondaı-aq qostanaılyq Ivan Dychkoǵa ( +91) senim artyp otyr. Qazirgi tańda ulttyq qurama músheleri Almaty oblysyndaǵy Novoalekseevka kentinde sońǵy oqý-jattyǵý jıynyn ótkizýde.
