Álem chempıonatynda 40 komanda oınaı alady - M. Platını
ASTANA. 28 qazan. QazAqparat - ÝEFA prezıdenti Mıshel Platını fýtboldan Álem chempıonatyna qatysatyn komandalardyń sanyn 40-qa jetkizý kaqjettigin aıtty, dep habarlaıdy Eýrosport.
Esterińizge sala keteıik, jýyrda FIFA prezıdenti Zepp Blatter Azııa men Afrıkanyń Mýndıaldaǵy komandalar sany az ekenin tilge tıek etken bolatyn. Onyń oıynsha, eýropalyq quramalardyń esebinen atalǵan eki aımaqtyń komandalar sanyn kóbeıtýge bolar edi. Buǵan qatysty Eýropa fýtbolynyń basshysy M. Platını óz pikirin bildirdi.
«Blatterdi bul máselede qoldaımyn. Biraq oǵan Eýropa ókilderiniń sanyn qysqartý arqyly qol jetkizý qajet dep eseptemeımin. Qatysýshylar sanyn búgingi 32-den 40-qa jetkizýge bolady. Mundaı jaǵdaıda biz Afrıkadan eki, Azııadan eki, Amerıkadan eki, Muhıt araldary men Eýropadan bir-birden komanda qosa alamyz», - dedi M. Platını.
Sonymen qatar ÝEFA prezıdentiniń pikirinshe, qatysýshylar sanyn 40-qa jetkizgenimen Álem chempıonatynyń ózi búgingi formatynan tek 3 kúnge ǵana uzarady.
