Álem chempıonatyna baratyn gımnasshy qyzdar anyqtaldy
ASTANA. QazAqparat - Jakartada ótken Jazǵy Azııa oıyndarynda kórkem gımnastıkadan top jarǵan arýlarymyz endi álem chempıonatynyń júldesine talasady, dep habarlaıdy QazAqparat tilshisi.
QR Ulttyq olımpıadalyq komıtetiniń habarlaýynsha, atalǵan birinshilik 10-16 qyrkúıek aralyǵynda Bolgarııanyń Sofııa qalasynda ótedi.
Kórkem gımnastıkadan Qazaqstan komandasynyń bas bapkeri Álııa Júsipova álemdik dodada senim artylyp otyrǵan sportshylardy atady.
Jekeleı synda keshe ǵana Azııa oıyndarynda top jarǵan Alına Ádilhanova, Adılıa Tilekenova jáne Daıana Ábdirbekova óner kórsetedi.
Toptyq jattyǵýda Býdnık Djessıka, Janerke Dáýletqulova, Daıana Jakýpova, Regına Sultanova, Anel Talǵatbek jáne Aıza Rýstamqyzy synǵa túsedi.
Eske sala keteıik, qazaqstandyq Alına Ádilhanova Azıadada jekeleı synda chempıon atandy.
Sondaı-aq Adılıa Tilekenova Daıana Ábdirbekovamen birlesip toptyq jattyǵýda úzdik shyqqan edi.
FOTO: Qazaqstan UOK baspasóz qyzmeti
