Álem chempıonaty: Juldyz Eshimova qola medal úshin beldesedi
ASTANA. QazAqparat - Býdapeshtte kúres túrlerinen ótip jatqan álem chempıonatynda 53 kelidegi Juldyz Eshimova jubanysh beldesýine qatysý múmkindigin aldy, dep habarlaıdy QazAqparat tilshisi.
QR Ulttyq olımpıada komıteti baspasóz qyzmetiniń habarlaýynsha, ókinishke qaraı, áıelder kúresiniń ókilderi ázirge júldemen qýanta almaı otyr.
Keshegi jarys kúninde qazaqstandyq balýan qyzdar irikteý aınalymynan asa almady. Tek 53 kelidegi Juldyz Eshimova ǵana jubanysh beldesýine qatysý múmkindigin aldy.
Juldyz 1/8 aınalymda amerıkalyq Sara Hıldebrandtan 1:5 esebimen utylǵan bolatyn. Alaıda, AQSh balýany fınalǵa joldama alyp, Eshimova taǵy da júldege talasý múmkindigine ıe boldy.
Eshimovanyń jubanysh beldesýindegi qarsylasy - ázerbaıjandyq Anjela Dorogan.
Keshe kilemge shyqqan Elmıra Syzdyqova (76 keli) jubanysh beldesýinde utyldy. Al Valentına Islamova (50 keli), Emma Tısına (57 keli) jáne Aıaýlym Qasymova (62 keli) alǵashqy aınalymdarda qarsylastaryna ese jiberdi.
Esterińizge sala keteıik, atalǵan álem chempıonatyn aldymen erkin kúres sheberleri bastaǵan bolatyn. Onda qazaqstandyq balýandar jarysty jalǵyz kúmis medalmen aıaqtady.
