Álem chempıonaty jas fýtbolshylar úshin zor múmkindik – sport kommentatory

ASTANA. QazAqparat - Tórtkúl dúnıedegi támam jurt kóz tikken 2022 jylǵy álem chempıonaty aıaqtalýǵa jaqyn. Jer sharynyń ár qıyrynan kelgen 32 quramanyń arasynan 4-i iriktelip shyqty. Jartylaı fınalǵa jetken úzdikterdiń barlyǵy - bas júldeden úmitker. Endi bir aptadan astam ýaqyttan keıin jeńimpaz tuǵyryna kóterilgen qurama anyqtalady. Oǵan qaı quramanyń múmkindigi bar? Bıylǵy dop dodasy qandaı qyzyqty oqıǵasymen erekshelenip otyr? Jasyl alań tórinde jarqyldap kózge túsken jas oıynshylar bar ma? Qatar elinen bizdiń úırenetin tusymyz qandaı? QazAqparat tilshisi belgili sport kommentatory Ermuhamed Máýlendi atalǵan taqyrypta áńgimege tartqan edi.

- Bıyl dop dodasynda jankúıer tańqalarlyq oıyndar kóp bolyp jatqan sekildi. Toptyq kezeńde myqty qarsylasyn qapy qaldyryp ketken orta deńgeıdegi quramalar az bolǵan joq. Olardyń oıyn deńgeıine qandaı baǵa beresiń?

- Meni toptyq kezeńnen keıin Marokko, Ońtústik Koreıa, Japonııa quramalary tańqaldyrdy. Ras, Marokko quramasynda esimi elge belgili fýtbolshylar bar. Olardyń toptyq kezeńnen shyǵatynyna senimdi boldym. Óıtkeni, quramy óte myqty. Sonldyqtan jankúıerlerge marokkolyq fýtbolshylardyń oıyny qyzyqty bolǵan shyǵar dep oılaımyn. Sondaı-aq, Avstralııa quramasy da kópshilikti jaqsy oıyn órnegimen tańqaldyrdy degen oıdamyn. Árıne, olarǵa sáttilik joldas boldy deıtin azamattar da tabylar. Dese de olar azýly qarsylastaryna laıyqty deńgeıde qarsy turýyna shamasy kele bermeıtini anyq. Jalpy, Azııa qurlyǵynan kelgen quramalar qazirge deıin joǵary tabysymen jankúıerdi qýanta almaı kele jatqany belgili.

- Endi budan burynǵy jyldarda joǵary nátıjege qol jetkizip júrgen quramalar jaıynda áńgime qozǵaı ketkenimiz artyq bolmas. Olar dop dodasynda óz deńgeıinde oıyn kórsete aldy ma?

- Árıne, dop dodasynda jankúıerge Brazılııa quramasynyń oıyny unady. Quramaǵa fýtbolshylar tańdaý jóninen eshqandaı másele joq. Tipti ekinshi quramanyń ózi óte myqty. Qosalqy quramdaǵy oıynshylardyń ózi aǵylshyn Premer-lıgasynyń aldyńǵy qatarynda júrgen «Arsenal» sekildi klýbtardyń negizgi oıynshylary sanalady. Odan basqa da top-klýbtardyń jeıdesin kıip júrgenin jaqsy bilemiz. Degenmen olar shırek fınalda Horvatııaǵa ese jiberip qoıdy.

Barlyǵymyz Kılıan Mbappe sekildi fýtbolshysy bar Frantsııa quramasyn da joǵary baǵalaımyz. Sondaı-aq, bilikti maman Garet Saýtgeıt baptaıtyn Anglııa strategııalyq turǵyda óte tamasha oınady.

- Qazirge deıin álem chempıonatynda nebári segiz qurama chempıon ataǵyna qol jetkizdi. Olardyń arasynda bes, tórt márte jeńis tuǵyryna kóterilgeni bar. Sondyqtan jankúıerler arasynda jańadan chempıon bolǵanyn qalaıtyndar az emes. Bıyl osyndaı sensatsııa bolýy múmkin be? Meniń oıymsha, tájirıbeli quramalar dop dodasyna úlken daıyndyqpen kelgen sekildi. Jasyl alań tórinde olardyń ózderiniń tájirıbesiniń arqasynda joǵary nátıjege qol jetkizip keledi. Jańa chempıondy kórýimiz múmkindigi qandaı?

- Sport kommentatory Eseı Jeńisuly budan buryn «QazAqparatqa» bergen suhbatynda «Jańa chempıon shyqsa deımin» degen oıyn bildirgen eken. Árıne, jankúıerlik kóńil men jýrnalıstik turǵydan jańa chempıonnyń shyqqanyn qalaımyz ǵoı. Bul chempıonatta ondaı jańalyq bolmaıtyn sekildi. Qazirge deıin chempıondyq tuǵyrǵa barlyǵy segiz qurama kóterilgen. Degenmen jańadan chempıon bolatyn quramany kórip turǵan joqpyn.

- Álem chempıonaty jas fýtbolshylardyń ózderin jaqsy qyrynan kórsetetin múmkindigi sekildi. Búginge deıin talaı juldyzdyń tusaýy osy básekede kesilip, keıinnen atalǵan sportqa kóz tikken jankúıerdiń kózaıymyna aınaldy. Árıne, olardyń aty-jónin atap taýysa almaıtynymyz belgili. Bıylǵy chempıonatta qandaı jas fýtbolshylar kózge tústi? Olar aldaǵy ýaqytta komandalar sapynda oıyn kórsetýi múmkin? Bul jóninde ne aıtar ediń?

- Kózge túsip jatqan jas fýtbolshylar bar. Toptyq kezeńde Kamerýnnyń qaqpashysy kózge tústi. Degenmen olar jarysty erte aıaqtap ketti. Qazir óz jas bolsa da joǵary deńgeıde oıyn kórsetip júrgen bir fýtbolshy bar. Nıderland quramasynyń shabýyl shebinde oınaıtyn fýtbolshysy Kodı Gakpoǵa top-klýbtardyń kózi túsip júr. Ol qazir óz eliniń PSV komandasynyń namysyn qorǵaıdy. Bul fýtbolshy keıingi ýaqytta jaqsy serpilis jasady. Oǵan álem chempıonatynan keıin alpaýyt komandalar talasatyn shyǵar degen oıdamyn.

- Ótken aıda álem chempıonatyna baryp-qaıtqanyńdy bilemiz. Qatar elinde atalǵan jarysty ótkizýge degen qandaı qyzyǵýshylyqty baıqadyń? Úırenetin tusymyz qandaı?

- Iá, álem chempıonatynyń alǵashqy aptasynda Qatar elinde bolyp qaıttym. Jergilikti turǵyndardyń dúbirli dodany ótkizýge qyzyǵýshylyǵy jaqsy deńgeıde. Qatar – shaǵyn memleket. Onda jergilikti halyqpen birge Pákistan, Bangladesh, Palestına, Iemen, Sýdan, Úndistannnan kelgen azamattar fýtbolǵa qyzyǵýshylyq tanytady. Olar Qatarda qarapaıym jumys isteıdi. Qoǵamdyq tamaqtandyrý oryndarynda, tazalyq mekemesinde, kommýnaldyq qyzmetterde eńbek etedi.

Fýtbolǵa baılanysty bizdiń úırenetin jaǵdaıymyz az emes. Árıne, álem chempıonatyn ótkizý maqsatynda stadıondardy keremet etip salyp tastady. Odan bólek te osyndaı oryndar qatary az emes. Bizdiń elimizge de bul baǵytta ınfraqurylymdy jaqsartý qajet dep sanaımyn.

- Áńgimeńe raqmet!

Eske salsaq, álem chempıonatynda jartylaı fınalǵa shyqqan quramalar anyqtaldy.