Álem chempıonaty: Tursynbaeva qysqa baǵdarlamadan keıin úshinshi keledi
ASTANA. QazAqparat - Búgin Japonııanyń Saıtama qalasynda ótip jatqan mánerlep syrǵanaýdan Álem chempıonaty aıasynda áıelder arasyndaǵy qysqa baǵdarlama básekesi aıaqtaldy. Qazaqstandyq Elızabet Tursynbaeva alǵashqy synnan soń úshinshi orynda tur, dep habarlaıdy QazAqparat.
QR Ulttyq Olımpıadalyq komıtetiniń aqparatyna sáıkes, jarys sońyndaǵy baspasóz máslıhatyna qatysqan Tursynbaevaǵa Álem chempıonatynyń kishi qola júldesi tabystaldy. Bul Qazaqstan úshin tarıhı medal. Óıtkeni, búginge deıin mánerlep syrǵanaýshy qyzdarymyz mundaı tabysqa jetken emes.
«Búgingi ónerim kóńilimnen shyqty. Kórermender de, muz aıdyny da tamasha. Japonııany jaqsy kóremin. Biraq búgingi oqıǵalardyń bárine salqynqandy qarap, aldaǵy jarys kúnin oılaý kerek. Erkin baǵdarlamaǵa daıyndalýǵa tıistimin. Eń bastysy - jınaqy ári sabyrly qalpymdy saqtaý. Bul medal bárinen buryn senimdilik syılady. Úlken nátıje kórsete alatynyma senemin. Tórt aınalym sekirý elementi de jarys ótken saıyn jaqsaryp keledi. Burynǵyǵa qaraǵanda turaqtalyp qaldy. Tórttik salhovty resmı jattyǵý kezeńderiniń barlyǵynda oryndap júrmin», - dedi Tursynbaeva.
Aıta keteıik, Elızabet Tursynbaeva Álem chempıonattarynda mundaı nátıjege alǵash ret qol jetkizip otyr. Qysqa baǵdarlama qorytyndysy boıynsha ol japonııalyq Kaorı Sakamoto (76.86) men reseılik Alına Zagıtovaǵa (82.08) ǵana jol berip tur. Bizdiń sportshy 75.96 upaı jınap, maýsymdaǵy eń úzdik kórsetkishine qol jetkizdi.
Buǵan deıin qazaqstandyq mánerlep syrǵanaýshy E.Tursynbaeva qatysyp jatqan Álem chempıonatynyń jarys kestesin jazǵan bolatynbyz.
