Álem chempıonaty toǵyzqumalaqtyń ózge elderde damyp kele jatqanyn kórsetti - Aınur Jaqapbaeva

Atalǵan álemdik dodada kimderdiń top jarǵanyn jazǵan edik. Búgin Túrkııa tórinde ótken doda týraly QazAqparat tilshisine Azııa chempıony, halyqaralyq dárejedegi sport sheberi, Qazaqstanǵa eńbek sińirgen jattyqtyrýshy, Toǵyzqumalaqtan Qazaqstannyń ulttyq quramasynyń bas jattyqtyrýshysy Aınur Jaqapbaeva aıtyp berdi.

- Tól oıynymyz toǵyzqumalaqtan álem birinshiligin túrik jurty qandaı deńgeıde uıymdastyra aldy?

- Óte joǵary deńgeıde ótti. Ár elden jarysqa kelgen oıynshylardy jaqsylap kútip alyp, shyǵaryp saldy. Jarystyń saltanatty ashylýy men jabylý rásiminde óte joǵary deńgeıde uıymdastyra bildi. Bir sózben aıtqanda barlyǵy talapqa saı boldy. Bul jerde tek toǵyzqumalaq oıyny emes, mangala oıynynan da álem chempıonaty ótti.

- Jalpy álem birinshiligine qansha elden sportshy keldi?

- Jalpy 16 memleketten 100-ge jýyq sportshy qatysty. Alǵashynda bul birinshilikke Germanııa oıynshylary da qatysýǵa ótinim bergen bolatyn. Ókinishke qaraı jarys bastalar sátte olar belgili bir sebepterge baılanysty bas tartyp, jarysqa qatysqan joq. Germanııany arnaıy atap otyrǵan sebebim - olarda toǵyzqumalaqtan álem chempıonatynyń qola júldegeri men Eýropa birinshiliginde top jarǵan myqty oıynshylar bolǵan. Olar kelgende oıyn kórigi tipten qyza túser me edi dep oıladyq.

- Ózge elderden kelgen oıynshylardan bıyl kimder kózge tústi?

- Bıyl ózge elderden kózge túsken sportshylar arasynan eń birinshi chehııalyq Pavel Noga degen azamatty atar edim. Ol toǵyzqumalaqtyń klassıka túrinen sońǵy týrda tórt dúrkin álem chempıony atanǵan Ǵalymjan Temirbaevtan utylyp qaldy. Eger sońǵy týrda utqanda álem chempıony atanar edi. Sosyn Mońǵolııadan kelgen oıynshylarda óte joǵary deńgeıde óner kórsetti. Jarystyń eki túrinen Ardabulan Shyndáýlet pen Ermanat Qulıbek qola medal jeńip aldy. Sondaı-aq, toǵyzqumalaqtyń blıts túrinen qyrǵyzstandyq jas oıynshy Marlıs Dýýlatbekov tuńǵysh ret álem chempıony atandy. Ol 11-synyptyń oqýshysy. Mine, bul tól oıynymyzdyń ózge elderde de joǵary deńgeıde damyp kele jatqanynyń belgisi.

- Al ózimizdiń oıynshylardan kimderdi atap óter edińiz? Bolashaǵynan úmit kútetin jastardan kimderdi baıqaı aldyńyz?

- Bizdiń úkilep aparǵan barlyq oıynshylarymyz jarady. Buryn álemniń 8 dúrkin chempıony Ásel Dálıeva 9 dúrkin chempıon atansa, erler arasyndaǵy sportshylarymyzda kezekti chempıondyq ataqtaryna qol jetkizdi. Al, bolashaǵynan zor úmit kútýge bolatyn jas sportshylar týraly aıtar bolsam Túrkistan obylysynyń oıynshysy Lına Karımova Astanada ótken álem chempıonatynda bir ret top jarsa, mine, Túrkııada ekinshi ret bas júldeni jeńip aldy. Taǵy bir aqtóbelik jas oıynshymyz bıyl 11-synypta oqyp jatqan Gúljanat Aldabergenova ótken jyly Azııa chempıony atansa, mine bıyl toǵyzqumalaqtan álem chempıony degen atqa ıe boldy. Mine, bul bolashaqta toǵyzqumalaqtan talaı álem chempıondary shyǵatynyn kórsetip otyr.

- Endi, aldaǵy josparlaryńyzdy bólise ketseńiz?

- Osy álem birinshiligi aıasynda dúnıejúzilik toǵyzqumalaq qaýymdastyǵynyń otyrysy ótti. Onda kelesi, ıaǵnı 2020 jyly toǵyzqumalaqtan Azııa chempıonaty men Eýropa birinshiligin qaı elde ótkizetinimiz belgili boldy. Azııa chempıonatyn Ózbekstanda ótkizsek, Eýropa birinshiligi Majarstanda ótetin bolyp belgilendi. Endi sol jarystarǵa tyńǵylyqty daıyndalamyz.

- Áńgimeńizge rahmet!