Álem chempıonaty: Sý dobynan Qazaqstan erler quramasy AQSh-tan jeńilip qaldy
ASTANA. QazAqparat - Japonııada ótip jatqan sý dobynan álem chempıonatynda Qazaqstan erler quramasy alǵashqy kezdesýinde AQSh-qa ese jiberdi, dep habarlaıdy QazAqparat tilshisi.
Álem chempıonaty 16-28 shilde aralyǵynda Japonııada ótkiziledi. Dúbirli doda bıyl on altynshy márte jalaýyn kóterdi.
Elimizdiń erler quramasy A tobynda AQSh, Avstralııa, Grekııamen synǵa túsedi.
Qazaqstandyq sý dobynyń sheberleri 17 shildede AQSh quramasymen kezdesti. Kezdesýde olar qarsylasyna 5:18 esebimen jeńilip qaldy.
Endi qazaqstandyq sportshylar 19 shildede Grekııa, 21 shildede Avstralııamen sheberlik baıqasady.
El quramasyna bıyl toǵyzynshy márte qatysyp otyr. Ázirge eń joǵary jetistigi - 1998, 2015, 2017 jyldarda alǵan 11 oryn.
Sondaı-aq, sý dobynan álem chempıonatynda elimizdiń áıelder quramasy synǵa túsip jatyr. Qarsylastary - Ispanııa, Izraıl jáne Nıderland.
Alǵashqy kezdesýinde el quramasy Izraılge 6:17 esebimen ese jiberdi.
Endi olar 18 shildede Nıderlandpen, 20 shildede Ispanııamen sheberlik baıqasady.
