Álem chempıonaty: Poltoranın skıatlon básekesinde 11-inshi keldi
ASTANA. QazAqparat - Avstrııanyń Zeefeld qalasynda ótip jatqan shańǵy sportynan Álem chempıonatynda erler arasyndaǵy skıatlon básekesi aıaqtaldy. Jarys qorytyndysy boıynsha qazaqstandyq Alekseı Poltoranın 11-shi orynǵa turaqtady, dep habarlaıdy QazAqparat Olympic.kz saıtyna silteme jasap.
Skıatlonda jarysty 16-shy nómirmen bastaǵan ol bes shaqyrymnan soń alǵashqy toǵyzdyq qatarynda boldy. 2,5 shaqyrymnan keıin qazaqstandyq sportshy kósh basyndaǵy frantsýz Jan-Mark Gaııardan 2,9 sekýndqa utylyp, 18-shi orynda turdy.
15 shaqyrymnan soń jetinshi orynda kele jatqan Poltoranın klassıkalyq ádispen jarysýdan myqtylar qatarynda ekenin taǵy bir dáleldedi. Alaıda, konkı ádisimen júgirýde ol qarqynyn báseńdetip, nátıjesinde 11-shi satyǵa turaqtady.
Bul synda norvegııalyq Shýr Rete jeńiske jetti. Ekinshi oryndy reseılik Aleksandr Bolshýnov, úshinshi oryndy norvegııalyq Martın Ionsrýd Sýndbıý jeńip aldy.
Ulttyq shańǵy jarysy federatsııasynyń aqparatyna sáıkes, skıatlon básekesinde Qazaqstan namysyn barlyǵy 7 sportshy qorǵady, olardyń úsheýi - áıelder, tórteýi - erler. Atap aıtqanda, Poltoranınnen bólek, Anna Shevchenko, Valerııa Tıýleneva, Irına Bykova, Evgenıı Velıchko, Vıtalıı Pýhkalo jáne Oljas Klımın synǵa tústi.
«Skıatlonnyń ereksheligi, jarys dıstantsııasy 2 bólikten turady. Birinshisin sportshylar - klassıkalyq, ekinshisin konkı stılimen júrip ótýi tıis. Áıelder quramy ókinishke qaraı, aıtarlyqtaı kórsetkishke qol jetkize almady. Eń jaqsy nátıje 37-inshi bolyp kelgen Valerııa Tólenevada. Irına Bykova 46-ynshy keldi. Starttyq hattamaǵa barlyǵy 60 atlet tirkelgen edi. Júldeli oryndar norvegııalyq Tereza Iohaýg pen Ingvıld Ostbergke jáne reseılik Natalıa Neprıaevaǵa buıyrdy», - delingen federatsııa aqparatynda.
Erler arasynda Velıchko - 42-shi, Pýhkalo - 48, Klımın 55-orynda.
Erteń, 24 aqpan kúni qazaqstandyq sportshylar komandalyq sprıntte óner kórsetedi.
