Álem chempıonaty: Parıjde taǵy bir qazaq balýany fınalǵa shyqty
ASTANA. QazAqparat - Frantsııanyń Parıj qalasynda kúres túrlerinen ótip jatqan álem chempıonatynda taǵy bir qazaq balýany Meırambek Aınaǵulov fınalǵa shyqty. Bul týraly Qazaqparat tilshisi birinshilikte júrgen Beıjiń olımpıadasynyń júldegeri Nurbaqyt Teńizbaevqa silteme jasap habarlaıdy.
«Mine, búgin álem birinshiliginiń ekinshi kúni! Keshe 71 keli salmaqtaǵy baýyrymyz fınalǵa deıin súrinbeı jetip, alǵashqy kúmis júldeni jeńip alsa, búgin 59 keli salmaqta taǵy bir baýyrymyz fınalǵa shyqty. Ol shırek fınalda koreıalyq balýandy esh qınalmaı utty. Bul qazaq eli úshin úlken jetistik. Osyǵan deıin grek-rım kúresinen eki qazaq balasy bir álem birinshiliginde fınalǵa deıin jetip kórmegen. Bul elimizde grek-rım kúresiniń qarqyndy damyp kele jatqanynyń aıqyn dáleli», - dep atap ótti N.Teńizbaev.
Esterińizge sala keteıik, Meırambek Aınaǵulov toptyq kezeńde qarsylasyn bar bolǵany 29 sekýndta 8:0 esebimen utyp shırek fınalǵa joldama aldy. Sondaı-aq, otandasymyz osy álem birinshiligindegi qarsylasyn eń jyldam utqan balýandardyń biri atandy.
