Álem chempıonaty: Medal alǵan qazaqstandyq boksshylarǵa qosymsha aqshalaı syıaqy beriledi

NUR-SULTAN. QazAqparat - Belgradta ótip jatqan álem chempıonatynda Qazaqstan ulttyq quramasynyń boksshylary jasyndaı jarqyldady. Bul týraly QazAqparat Qazaqstan boks federatsııasynyń baspasóz qyzmetine silteme jasap habarlaıdy.

Bizdiń sportshylar bes medal jeńip aldy. Fınaldyń birinshi kúninde bizde altyn, kúmis jáne qola bar. Búgin chempıonattyń sońǵy kúni jáne el namysyn taǵy eki qazaqstandyq qorǵaıdy. Chempıonat medaldarynan bólek, sportshylar AIBA-dan 100 000, 50 000 jáne 25 000 AQSh dollary kóleminde kepildendirilgen júldelerge ıe bolady.

Qazaqstan boks federatsııasynyń prezıdenti Keńes Raqyshev óz atynan álem chempıonatynyń chempıondary men júldegerlerine qosymsha aqshalaı syıaqy beredi.

Al elge kelgen soń boksshylarymyzǵa tolyq aqshalaı sertıfıkattar tabystalady: birinshi orynǵa 70 000, ekinshi orynǵa 50 000 jáne úshinshi orynǵa 30 000 AQSh dollary.