Álem chempıonaty: Medal alǵan boksshylarymyz aqshalaı syıaqy alady

NUR-SULTAN. QazAqparat – Polshada ótken jastar arasyndaǵy álem chempıonatynda júldeger bolǵan qazaqstandyq boksshylar aqshalaı syıaqy alady. Bul týraly Qazaqstan boks federatsııasynyń atqarýshy dırektory Maratbek Myqtybekov málim etti, dep habarlaıdy QazAqparat Sports.kz-ke silteme jasap.

«Otandyq boksshylardyń kásibı boksqa aýysýyna jáne jekelegen promoýterlik kompanııalardyń qazirdiń ózinde talantty boksshylarymyzǵa qyzyǵýshylyq tanytýyna qatysty qaýipterge keletin bolsaq, men, eń aldymen, óz Otanyna degen patrıotızm bolý kerek dep sanaımyn. Bul da jas sportshylardy tárbıeleýdiń bir bóligi. Bizdiń uıymshyl, tatý komandamyz bar, osy jerde men Qaırat Satjanov bastaǵan jattyqtyrýshylar shtabyna osyndaı orta qurǵany úshin alǵys aıtqym keledi. Árıne, federatsııa tarapynan biz sportshylarymyz úshin týrnırlerge, daıyndyqqa qajetti jaǵdaılardy jasaımyz.

Budan bólek, boksshylarmen kezdesýde Qazaqstan boks federatsııasynyń basshysy Keńes Raqyshev iri týrnırlerde tabysty óner kórsetkeni úshin bizdiń boksshylar aqshalaı kótermeleýler alatynyn, bul da otandyq sportshylarǵa jaqsy yntalandyrý bolatynyn aıtty. Jastar arasyndaǵy álem chempıonatyndaǵy jetistik te budan tys qalmaıdy», - dedi Myqtybekov.

Eske salaıyq, bokstan ótken jastar arasyndaǵy álem chempıonaty Polshanyń Keltse qalasynda ótken bolatyn. Týrnırden qazaqstandyq sportshylar eki altyn, eki kúmis medal oljalap qaıtty.