Álem chempıonaty: Qyrǵyzdar mońǵol kókparshylarynan basym tústi
ASTANA. QazAqparat - Astana qalasynyń «Qazanat» atshabarynda kókpardan ótip jatqan álem chempıonatynda Qyrǵyzstan quramasy mońǵol kókparshylaryn 4:0 esebimen utty, dep habarlaıdy «QazAqparat» HAA tilshisi.
Tartysty jarystyń 6-shy mınýtynda qyrǵyz kókparshysy esep ashty. Birinshi salymnyń sońynan ekinshi upaıǵa qol jetkizgen qyrǵyzdar alǵashqy kezeńdi 2:0 esebimen aıaqtady. Ekinshi kezeńde birneshe múmkindigi bolǵanymen, mońǵol kókparshylary oıyn sátin sońyna deıin jetkize alǵan joq. Kókpardyń kelesi bóligi de 4:0 esebimen qyrǵyzdardyń paıdasyna sheshildi.
«Oıyn ońaı bolyp jatqan joq. Bizdiń elden osy jyldyń naýryz jáne mamyr aılaryndaǵy respýblıkalyq kókpar saıystarynan kózge kóringen eń saqa kókparshylar keldi. Qazaqstannyń kókpardan tuńǵysh álem chempıonatyn ótkizip jatqanyna shyn qýanyp otyrmyz. Naqty bir quramany chempıon dep bólip jaryp aıta almaımyn. Qazylyq ádil bolsa jeńiske bizdiń de úmitimiz bar», - deıdi Qyrǵyz Respýblıkasy «Kókbóri» federatsııasynyń vıtse-prezıdenti Jyrǵalbek Samatov.
Eske sala ketsek, búgin Astanadaǵy «Qazanat» atshabarynda kókpardan álem chempıonaty bastaldy. Jarystyń alǵashqy kúninde Qazaqstan Aýǵanstan quramasyn jeńse, Tájikstan Ózbekstan quramasynan basym tústi. Ázerbaıjan quramasy kelmegendikten, jeńis avtomatty túrde Qytaı quramasyna buıyrdy. Al kókpar oıyndaryna tuńǵysh qatysyp otyrǵan Amerıka kovboılary Túrkııanyń kókparshylarynan oısyraı jeńildi. Vengrııa quramasy Reseı kókparshylaryna ese jiberdi.
