Álem chempıonaty: Qazaqstannyń erkin kúres sheberleri ekinshi qola medalǵa qol jetkizdi
ASTANA. 23 tamyz. QazAqparat - Ázirbaıjannyń Baký qalasynda ótip jatqan kadetter arasyndaǵy Álem chempınatynda Qazaqstannyń erkin kúres sheberleri ekinshi qola medaldi oljalady.
Týrnırde 54 keli salmaq dárejesinde Kanadanyń balýany Dıllan Ýılıamspen kezdesken jerlesimiz Baýyrjan Tórebek jekpe-jektiń alǵashqy mınýttarynan bastap upaı jınaýmen boldy. Osydan keıin qarsylasyn «týshege» salyp, chempıonattyń qola júldesin jeńip aldy. Qazaqstannyń qorjynynda - ekinshi qola medal. Al buǵan deıin 42 keli salmaq dárejesinde óner kórsetken Aıtýǵan Janjigitov bizge alǵashqy júldeni alyp bergen bolatyn. «Shynymdy aıtsam, bul jarys meni kóp nársege úıretti. Maǵan áli biraz eńbektený kerek. Osydan bastap men jastar quramasyna aýysyp, 50 keli salmaq dárejesinde óner kórsetetin bolamyn. Ol sanatta Vladımır Kýdrın degen álem chempıony bar. Biraq bárin durys isteseń, jeńilmeıtin adam joq dep oılaımyn», - deıdi Álem chempıonatynyń qola júldegeri, kadet A.Janjigitov.
