Álem chempıonaty: Qazaqstan velosport tarıhynda «sprıntte» alǵashqy medal ıemdendi
ASTANA. QazAqparat - Qazaqstandyq veloshabandoz Andreı Chýgaı trekten jasóspirimder arasynda ótken Álem chempıonatynda qola júlde enshiledi, dep habarlaıdy QazAqparat tilshisi.
18 jasar kókshetaýlyq keırın jarysynda, ıaǵnı sprınterlik saıys boıynsha 3-oryndy jeńip aldy.
Andreı Chýgaıdyń álemdik birinshiliktegi jetistigin otandyq velosport úshin ataýly oqıǵa dep aıtýǵa bolady. Qazaqstan velosport tarıhynda álem chempıonatynda sprınter alǵash ret júldeli orynǵa ıe boldy.
Jarystan keıin velosporttan Olımpıadaǵa daıyndyq ortalyǵynyń aǵa jattyrýshysy Ivan Sıvash jýrnalısterge bergen suhbaynda jarystyń óte qıyn bolǵanyn atap ótti.
"Barlyǵy 45 shabandoz qatysty. Andreı, negizi alǵashqy irikteýden óte almaı, jubanysh júrisinde ǵana joly boldy. Al odan keıin jartylaı fınalǵa ótti. Básekelestik óte joǵary bolǵandyqtan, qulaý da kóp boldy. Qýanyshqa oraı Andreı olardyń arasynda bolmady. Barlyǵy da joǵary nátıje kórsetýge talpyndy. Úshinshi oryn úshin úsh shabandoz talasqa túsip, bir jolaqtyń boıymen júrdi. Alaıda Andreı olardan biraz basym tústi", dedi ol.
Sondaı-aq, aǵa jattyrýshysy Ivan Sıvash osy birinshilikke daıyndyqty qashan bastaǵanyn da aıtyp berdi.
"Negizi álem chempıonatyna daıyndyqty biz naýryz aıynda bastaǵan bolatynbyz. Tórt halyqaralyq jarysqa qatysyp, Qyrǵyzstanda jáne Astanada bizdiń velotrekte jattyǵý jıyndarynda boldyq. Baıyppen daıyndaldyq. Jigitter birneshe aı boıy ýılerinde bolǵan joq. Álem chempıonatyna eki jylǵa jýyq ári barymyzdy salyp daıyndaldyq. Mysaly byltyrǵy jylǵy álem chempıonatynda kórsetkishtiń jyldan jylǵa jaqsaryp kele jatqany baıqaldy. Al bıylǵy jyly júldeli oryndy ıemdendik. Meniń oıymsha, sprıntten Qazaqstannyń bolashaǵy zor. Qazirgi tańda sprınterler sany kóp emes. Tańdaýly shabandozdardy qosa eseptegende shamamen 10-12 adam. Alaıda sprınt jyl sanap damý ústinde. Jalpy bul betalys álemdik velosportta da baıqalady», dep atap ótti aǵa jattyqtyrýshy.
Trektegi velosporttan jasóspirimder arasyndaǵy Álem chempıonaty Shveıtsarııanyń Egl qalasynda 15 tamyz kúni bastaldy, ol 19 tamyz kúni máresine jetpek. Álem birinshilige Ulttyq qurama sapynda 14 jasóspirim men jasóspirim qyzdar attanǵan bolatyn.
