Álem chempıonaty: Qazaq balýandary qaı salmaqta kúresedi
ASTANA. QazAqparat - Beıjiń Olımpıada oıyndarynyń júldegeri Nurbaqyt Teńizbaev Almat Kebispaevtiń jańa salmaqqa ótkenin aıtty, dep habarlaıdy QazAqparat tilshisi.
Ol bul týraly óziniń feısbýk paraqshasynda jazdy.
Aıta keteıik, bıyl grek-rım kúresinen álem chempıonaty 21-26 tamyz aralyǵynda Parıj qalasynda ótedi. Olımpıadadan keıingi mańyzdy doda, álem chempıonaty bolǵandyqtan, ár eldiń balýandary oǵan tyńǵylyqty daıyndalýda.
«Olımpıada oıyndarynan keıin kóptegen balýandar salmaq dárejelerin aýystyryp jatyr. Máselen, bizdiń Almat Kebispaev buryn 59 kelide kúresken bolsa, endi 66 keli salmaqqa ótti. Onyń ornyna 59 keli salmaqqa talantty balýan Meırambek Aınaqulov keldi. Dál osyndaı ózgerister basqa da elderdiń quramalarynda bolyp jatyr. Reseı komandasynyń 75 kelidegi eki dúrkin Olımpıada chempıony Roman Vlasov 80 keli salmaqta óner kórsetedi. Sondaı-aq, erkin kúres balýandary arasynda kezdesýler óte tartysty bolmaq. 86 keli salmaqta Rıo Olımpıadasynyń chempıony Abdýlrashıd Sadýlaev salmaq dárejesin ózgertip, 97 kelige aýysqan bolatyn, ol jerde Rıo Olımpıadasynyń chempıony amerıkandyq Kaıl Snaıder bar, osy eki balýan arasyndaǵy kezdesýdi kúres jankúıerleri kútip júrgeni anyq. Aqjúrek Tańatarovtyń salmaǵynda da jarys tartysty bolady. Bul salmaqta favorıt qazirshe Italııanyń balýany - Frank Chamızo. Meniń oıymsha, bul álem chempıonatynda jańa esimder shyǵyp qalýy múmkin!», - dep jazdy ol.
