Álem chempıonaty: qaı eldiń boksshylary jartylaı fınalǵa shyqty

BELGRAD. QazAqparat - Serbııa astanasy Belgrad qalasynda ótip jatqan bokstan álem chempıonatynda jartylaı fınalǵa shyqqan sportshylar jóninen Qazaqstan quramasy alǵashqy oryndarda tur, dep habarlaıdy QazAqparat tilshisi.

Jarystyń atalǵan satysynda el quramasynan Temirtas Júsipov (48 keli), Sáken Bıbosynov (51 keli), Mahmýd Sabyrhan (54 keli), Serık Temirjanov (57 keli) jáne Abylaıhan Júsipov (67 keli) synǵa túsedi.

Qazaqstan quramasy bul jóninen Reseı jáne Kýbamen shamalas tur. Atalǵan elderden de bes-besten boksshy jartylaı fınalǵa jetti.

Sondaı-aq, jartylaı fınalda AQSh pen Taılandta - tórt, Ázerbaıjan men Frantsııada - úsh, Ózbekstan, Japonııa, Grýzııa, Belarýs pen Italııada - eki bylǵary qolap sheberi fınalǵa shyǵýǵa talasady. Al Úndistan, Ispanııa, Serbııa, Albanııa, Ýkraına, Shotlandııa, Iran, Domınıkan Respýblıkasy, Belgııa, Trınıdad jáne Tobago, Brazılııa men Armenııa enshisinde bir-birden boksshylar bar.

Bıyl álem chempıonatynda 41 elden 219 bylǵary qolǵap sheberi baq synaýǵa keldi. Olardyń arasynan 14 memleket júldeli oryndarǵa talasýǵa múmkindik aldy.

Jartylaı fınal 4 qarashada ótkiziledi. Álem chempıonaty 6 qarashada máresine jetedi.