Álem chempıonaty: Erkin kúresten Rızabek Aıtmuhan kúmis aldy

ASTANA. QazAqparat - Iordanııa astanasy Amman qalasynda ótip jatqan kúres túrlerinen 20 jasqa deıingi jastar arasynda álem chempıonatynda Rızabek Aıtmuhan kúmis júldeger atandy, dep habarlaıdy QazAqparat tilshisi.

El quramasynan 16 tamyzda erkin kúresten Rızabek Aıtmuhan (92 keli) alǵashqy beldesýde qyrǵyz sportshysy Nurbolat Adylýýlýdy, odan keıin kanadalyq Samýel Pereırany jeńdi. Jartylaı fınalda grýzııalyq Georgıı Romelashvılıdi qapy qaldyrsa, fınalda ırandyq Mohammadmobın Golomalımıge jol berdi.

Aıta keteıik, Rızabek bıyl Almatyda ótken erkin kúresten QR-nyń VI jazǵy Spartakıadasynda top jarǵan. Osydan keıin Astanadaǵy eresekter arasynda Azııa chempıonatynda kúmis júldege qol jetkizdi.

Sondaı-aq, álem chempıonatynda áıelder kúresinen 50, 55, 59, 65 jáne 76 kelide aldyn-ala beldesýler ótkizdi. El quramasynan aqtóbelik Alına Ertóstik jubanysh beldesýinde synǵa túsetin boldy. Ol 17 tamyzda polshalyq Danıel Tkachýpen kezdesedi.

Oǵan qosa áıelder kúresinen ózge salmaqtarda júldeler sarapqa salynady.

Aıta ketsek, dúbirli doda 14-20 tamyz aralyǵynda ótkiziledi. Oǵan elimizdiń atynan grek-rım, erkin jáne áıelder kúresinen sportshylar qatysady.