Álem chempıonaty: Dmıtrıı Balandın jetinshi orynǵa taban tiredi
NUR-SULTAN. QazAqparat – Ońtústik Koreıanyń Kvandjý qalasynda ótip jatqan sý sporty túrlerinen Álem chempıonatynda 200 metrge brass ádisimen júzýden fınaldyq báseke aıaqtaldy, dep habarlaıdy QazAqparat.
QR Ulttyq Olımpıadalyq komıtetiniń málimetine sáıkes, aqtyq synǵa joldama alǵan qazaqstandyq Dmıtrıı Balandın jetinshi orynnan kórindi. Ol atalǵan qashyqtyqty 2 mınýt 08.25 sekýndta júzip ótti.
200 metrge brass ádisimen júzýden álem chempıony ataǵyn reseılik Anton Chýpkov enshiledi. Ol álem rekordyn ornatyp, 2:06.12 ýaqyt kórsetkishinde márege jetti. Kúmis júldeni avstralııalyq Metıý Ýılsson, qola medaldi japonııalyq Ippeı Vatanabe jeńip aldy.
Aıta ketelik, Dmıtrıı Balandın Olımpıada oıyndaryna
daıyndyqty endi bastady. Rıo Olımpıadasynyń chempıony Qazaqstan UOK arnaıy
jobasy aıasynda áıgili amerıkalyq maman Deıv Salonyń qolastynda, AQSh-ta
jattyǵýda.
«Men úshin álem chempıonaty áli aıaqtalǵan joq. Alda komandalyq estafeta bar. Biz Olımpıada oıyndaryna joldama alýǵa tyrysamyz. Jalpy alǵanda, jekeleı syndaǵy óz ónerime kóńilim tolady. Júz metrlik jarysta óz nátıjemdi jaqsartyp, el rekordyn jańarttym. 200 metrlik synda bári men oılaǵandaı bolmady. Biraq kóńil túsiretindeı jaǵdaı emes. Munda aerobty daıyndyǵym azdap jetispeı qaldy. Dese de, nátıjem jaman emes. Ońaı bolǵan joq, árıne. Endi bapkermen birge jattyǵýdy jalǵastyramyz. Jarystyń vıdeosyn tamashalap, bárin saraptaımyz. Sol saraptama qorytyndysy boıynsha daıyndyqty retke keltirý maqsaty tur alda. Álem chempıonatynan soń azdaǵan demalys alyp, Los-Andjeleske, Deıv Saloǵa qaıta oralamyz. Deıv álem chempıonatynda bizge baǵyt berip, árbir jarystan soń óz aqyl-keńesimen bólisti. Sol úshin kóp rahmet»,- dedi Balandın.
