Álem chempıonaty: Áljanov Ózbekstannyń ákki boksshysyna taǵy ese jiberdi
ASTANA. QazAqparat - Germanııanyń Gambýrg qalasynda ótip jatqan bokstan álem chempıonatynyń shırek fınalynda Erik Áljanov ózbek qarsylasy Bektemır Melıkýzıevke taǵy da ese jiberdi, dep habarlaıdy QazAqparat.
Esterińizde bolsa, Tashkentte ótken Azııa chempıonatynyń fınaldyq kezdesýinde qazaqstandyq boksshy ózbekstandyqpen judyryqtasyp, ese jibergen edi. Bul joly da ese qaıtarý múmkin bolmady, tóreshiler jeńisti Melıkýzıevke berdi.
Aıta keteıik, buǵan deıin 69 keli salmaq sanatynda sharshy alańǵa shyqqanAbylaıhan Júsipov venesýelalyq Gabrıel Maestro Peresti jeńdi.
Vasılıı Levıt bolsa avstralııalyq Djeıson Ýaıtlımen judyryqtasyp , jeńiske jetti. Endi jartylaı fınalda Vasılıı 27 jastaǵy Kýba sportshysy Erıslandı Savonmen kezdesedi. Savon Dohada ótken álem chempıonatynyń kúmis júldegeri jáne Rıo Olımpıadasynyń qola medal ıegeri. Levıt pen Savonnyń jekpe-jegi 31 tamyz kúni ótedi.
Al Ábilxan Amanqul 75 keli salmaq sanatynda rıngke kóterilip, Rıo Olımpıadasynyń chempıony kýbalyq Arlen Lopesti utqan bolatyn .
Qaırat Eralıev (56 keli) shırek fınalda nemis boksshysy El-Hag Omarmen kezdesip, ony jergilikti jankúıerler aldynda jerge qaratty .
Al onyń aldynda 49 keli salmaq sanatynda jarys jolyna shyqqan boksshymyz Jomart Erjan eki dúrkin Eýropa chempıony, álem chempıonatynyń kúmis júldegeri reseılik Vasılıı Egorovti utqan edi.
Qazirgi ýaqytta sharshy alańda 91 keli salmaq sanatynda Qamshybek Qońqabaev ózbek boksshysy Bahadyr Jalolovpen judyryqtasýda.
