Álem chempıonaty-2017: Qazaq boksshylary aıqastaryn jeńispen bastady
ASTANA. QazAqparat - Búgin Germanııanyń Gambýrg qalasynda áýesqoı boksshylar arasynda bastalǵan XIX álem chempıonatynda qazaqstandyq bylǵary qolǵap sheberleri alǵashqy aıqastaryn jeńispen bastady, dep habarlaıdy QazAqparat tilshisi.
Alǵashqy bolyp sharshy alańǵa shyqqan 49 kelige deıingi salmaqtaǵy boksshymyz Erjan Jomart gvatemalalyq qarsylasy Maıkl Tele Teleni qapy qaldyrsa, 56 kelide synǵa túsken Qaırat Eralıev te birinshi aıqasyn jeńispen bastady. Eralıev birinshi jekpe-jeginde meksıkalyq Krıstofer Flores Maganany aıqyn basymdyqpen utty.
Aıta keteıik, 25 tamyz ben 3 qyrkúıek arasynda ótetin dúbirli dodaǵa álemniń 85 elinen 280 boksshy baq synaýǵa kelgen.
Esterińizge sala keteıik, bul álem birinshiliginde Qazaqstan namysyn 49 keli salmaqta Erjan Jomart, 52 keli salmaqta Azamat Isaqulov, 56 keli salmaqta Qaırat Eralıev, 60 kelide Ádilet Qurmetov, 64 kelide Bekdáýlet Ibragımov, 69 kelide Abylaıhan Júsipov, 75 kelide Ábilhan Amanqul, 81 kelide Erik Áljanov, 91 kelide Vasılıı Levıt jáne asa aýyr salmaqta Qamshybek Qońqabaev qorǵaıdy.
