Álem chempıonatynda jeńilip qalǵan Nursultan Tursynov endi qolaǵa talasady
Serbııa astanasy Belgradta kúresten álem chempıonatynyń segizinshi jarys kúni ótip jatyr, dep habarlaıdy QazAqparat sportty damytý dırektsııasyna silteme jasap.
Sanaýly sátter buryn Ulttyq qurama sportshysy Nursultan Tursynov (87 kg) jartylaı fınalda byltyrǵy qola medal ıesi Álı Djengızden (Túrkııa) jeńilip qaldy.
Endi Nursultan erteń 2 dúrkin álem chempıony, Tokıo Olımpıadasynyń jeńimpazy Jan Belenıýk (Ýkraına) nemese Joldasbek Berdimuratovtyń (Ózbekstan) birimen qola júldeni jáne Parıj Olımpıadasynyń joldamasyn sarapqa salady.
Nursultan Tursynov (87 kg) alǵashqy kezdesýinde Mırko Mıngýtstsıdy (Italııa), Park Sanhekty (Ońústik Koreıa), sosyn shırek fınalda 3 dúrkin Azııa chempıony Nasyr Alızadeni (Iran) orta jolda qaıtardy.
Sondaı-aq búgin bozkilemge Ulttyq qurama palýandarynan Muhamedáli Mamyrbek (63 kg), Almat Kebispaev (67 kg), Ibragım Magomadov (72 kg) shyǵyp, qarsylastaryna erte jol berdi.
Almat Kebispaev (67 kg) irikteýde reseılik palýan Aslan Vısaıtovty utqanymen, 1\16 aınalymda Mamada Sılladaǵa sońǵy sekýndtarda ádis jasaýǵa múmkindik berip qoıyp, aılasyn asyra almady.
Frantsııa quramasynyń palýany kelesi kezeńde byltyrǵy qola júlde ıegeri qyrǵyz Amantur Ismaılovtan jeńilgendikten, Almat jubanysh beldesýlerine qatysa almaıdy.
«Sıllamen Tokıo Olımpıadasyna irikteý týrnırinde kúresip, jol bergem. Bul joly sol kezdegi qatelerimdi túzegendeı boldym. Utyp kele jatqam. Qarsylasymnyń boıy uzyn. Bastan ustap laqtyratyn ádisime jaqsy daıyndalǵan. Sonysymen parterde yńǵaısyzdaý qarsylas boldy. Soǵan qaramastan parterde oılaǵanymdy iske asyrdym. Áıtkenmen de kútpegen ádis qoldanyp ketti. Men úshin aýyr jeńilis boldy. Lıtsenzııalyq chempıonat bolǵan soń bári tyńǵylyqty daıyndalyp keldi. Shamamnyń jetken jeri osy boldy», - dep pikir bildirdi Almat sportty damytý dırektsııasyna bergen suhbatynda.
Muhamedáli Mamyrbek alǵashqy aıqasynda reseılik Astemır Bıjoevpen teń túsken (5-5). Sońǵy bolyp upaıdy qarsylas alǵandyqtan shırek fınalǵa Astemır shyqty.
Dál osyndaı jaǵdaı jubanysh beldesýinde Ibragım Magomadov pen Stoıan Kýbatov (Bolgarııa)arasynda bolyp, qazaqstandyq palýan júlde talasynan syrt qaldy.
Keshki sessııada Halyqaralyq kúres federatsııasy (UWW) uzaq jyl halyqaralyq deńgeıde tóreshi retinde qyzmet etip, eńbek jolyn aıaqtaǵan birqatar azamatty saltanatty túrde marapattady.
Bul qatarda olımpıadalyq dárejedegi tóreshi, qazaqstandyq Baqytjan Jaqsyǵulov bar.
Otandasymyz tóreshilikti 2007 jyly bastap, osy ýaqyt aralyǵynda eki Olımpıadada (London-2012, Rıo-2016), eresekter arasyndaǵy 6 álem chempıonatynda, 23 jasqa deıingi úsh álem chempıonatynda, jastar arasyndaǵy tórt álem chempıonatynda, sondaı-aq eki Azııa oıyndary men 14 Azııa chempıonatynda jumys istedi.
