Álem chempıonatynda top jarǵan boksshylar men bapkerlerine qarjylaı syıaqy tabystaldy
ASTANA. KAZINFORM – Týrızm jáne sport mınıstri Erbol Myrzabosynov Anglııanyń Lıverpýl qalasynda ótken World Boxing aıasyndaǵy tuńǵysh álem chempıonatynda tarıhı jeńiske jetip, jalpykomandalyq esepte kósh bastaǵan Qazaqstan ulttyq quramasynyń boksshylary, jattyqtyrýshylary jáne federatsııa ókilderimen kezdesti.
Mınıstr el abyroıyn asqaqtatqan sportshylardy tolaıym tabysymen quttyqtap, bul jeńister jas urpaqqa úlken shabyt syılaǵanyn atap ótti.
– Memleket basshysy álem chempıonatynan keıin sizderdi jeke qabyldap, quttyqtady. Bul – bokstyń damýyna memleket tarapynan kórsetilip otyrǵan qoldaýdyń aıǵaǵy. Qazir biz boksty damytýdyń 2026-2030 jyldarǵa arnalǵan tujyrymdamasyn ázirlep jatyrmyz. Jaqyn arada Ulttyq sport ýnıversıteti ashylady. Onyń quramynda zamanaýı zaldarmen jáne tórt rıngpen jabdyqtalǵan boks kafedrasy jumys isteıdi. Bul halyqaralyq deńgeıdegi sportshylardy daıarlaýǵa jol ashady. Jattyqtyrýshylar shtabyna aldaǵy jarystarǵa tabysty daıyndyq tileımin. Alda bizdi álem kýboginiń fınaly, álem chempıonaty, 2026 jylǵy jazǵy Azııa oıyndary kútip tur. Árıne, basty maqsat – Olımpıada, – dedi Erbol Myrzabosynov.
Jıyn barysynda otandyq sport pen bokstyń damýyna úles qosyp júrgen sala mamandary men álemdik arenada el namysyn qorǵaǵan sportshylarǵa qurmet kórsetildi. Atap aıtqanda, Qazaqstan boks federatsııasynyń prezıdenti Shahmurat Mútálip «Qurmetti sport qyzmetkeri» tósbelgisimen marapattaldy. Federatsııa vıtse-prezıdenti Darhan Qyzaıbaev, QR Ulttyq Olımpıada komıtetiniń bas hatshysy Álimjan Aqaev, federatsııanyń atqarýshy dırektory Raýan Igenev, bas hatshysy Mereı Aqshalov, sondaı-aq erler quramasynyń bas jattyqtyrýshysy Qaırat Sátjanov pen áıelder quramasynyń bas jattyqtyrýshysy Eldos Saıdalınge «Qurmet gramotasy» tabystaldy. Sonymen qatar Erbol Myrzabosynov bokstan áıelder ulttyq quramasynyń dárigeri Áıgerim Jekeeva, erler quramasynyń dárigeri Talǵat Quqanov, dáriger-fızıolog Ersultan ıÝldashev jáne massajıst Álibek Ábilovtyń eńbekterin erekshe atap ótip, olardy mınıstrliktiń Alǵys hatymen marapattady.
Budan bólek, Qazaqstan boks federatsııasy tarapynan qarjylaı syıaqy tabystaldy. Týrızm jáne sport mınıstriniń Alǵys haty chempıondardyń jeke bapkerlerine de tapsyryldy. Al Lıverpýl tórinde tabysty óner kórsetip, jankúıerlerge zor qýanysh syılaǵan Sanjar Táshkenbaı, Mahmud Sabyrhan, Tórehan Sabyrhan, Aıbek Oralbaı, Nazym Qyzaıbaı, Alýa Balqybekova, Vıktorııa Grafeeva, Aıda Ábikeeva, Natalıa Bogdanova jáne Eldana Tálipovaǵa «Qurmet gramotasy» men Qazaqstan boks federatsııasy tarapynan qarjylaı syıaqy tabystaldy.
Aıta keteıik, Anglııadaǵy dúbirli dodada Qazaqstan quramasy 7 altyn, 1 kúmis jáne 2 qola medal jeńip alyp, jalpykomandalyq esepte birinshi orynǵa ıe bolǵan edi.
Prezıdent bokstan Álem chempıonatynda top jarǵan boksshylardy quttyqtady.