Álem chempıonatynda qazaqstandyq gandbolshylar Ispanııadan jeńilip qaldy

Búgin gandboldan áıelder quramalary arasyndaǵy álem chempıonatynda Qazaqstan quramasy Ispanııamen kezdesti, dep habarlaıdy Kazinform.

Qazaqstandyq gandbolshylar G tobynda synǵa túsedi. Qarsylastary — Brazılııa, Ispanııa men Ýkraına.

Alǵashqy kezdesýinde qazaqstandyq qyzdar tájirıbeli Ispanııa quramasymen sheberlik baıqasty.

Alǵashqy mınýttarda el quramasy esepte alda turdy.

Degenmen oıyn barysynda ıspanııalyq gandbolshylar basymdyqty arttyra tústi. Nátıjesinde birinshi kezeńde olar 14:8 esebimen jeńdi.

Ekinshi kezeńde de qarsylas quramanyń basymdyǵy baıqalyp turdy. Olar óz múmkindigin tıimdi paıdalana bildi.

Kezdesýde qazaqstandyq gandbolshylar qarsylasynan 17:34 esebimen jeńilip qaldy.

Endi el quramasy 1 jeltoqsanda Brazılııamen sheberlik baıqassa, 3 jeltoqsanda Ýkraınamen kezdesedi.

Sondaı-aq, atalǵan topta Brazılııa quramasy Ýkraınany 35:20 esebimen súrindirdi.

Qazaqstandyq gandbolshylar álem chempıonatyna jetinshi márte qatysyp otyr. Ázirge eń joǵary kórsetkishi — 2007 jylǵy 18 oryn.

Aıta ketsek, álem chempıonaty 1957 jyldan beri turaqty túrde ótkizilip keledi. Qazirge deıin barlyǵy 14 qurama jeńimpaz tuǵyryna kóterildi.