Álem chempıonatyna irikteý: Qazaqstan quramasy Belgııamen teń tústi

ASTANA. KAZINFORM – Búgin fýtboldan Qazaqstan ulttyq quramasy 2026 jylǵy álem chempıonaty irikteý kezeńindegi segizinshi oıynyn elordada Belgııaǵa qarsy ótkizdi.

Kezdesý barysynda alǵashqy mınýttan belgııalyq fýtbolshylar jyldam gol soǵý múmkindigin izdedi. Oǵan otandastarymyz laıyqty tosqaýyl qoıa bildi. Esesine qarsy shabýylǵa shyǵyp, qarsylastar qaqpasy mańynda jıi boı kórsetti. Alań ortasynda belgııalyq fýtbolshylar qatelikke jol berdi. Osyndaı múmkindikti qalt jibermegen qazaqstandyq jas shabýylshy Dastan Sátpaev 9-mınýtta Belgııa qaqpasynan sańylaý taýyp ketti.  

Bul – 17 jastaǵy jas fýtbolshynyń qurama sapynda soqqan alǵashqy goly. Dastan Sátpaev ulttyq qurama sapyndaǵy alǵashqy oıynyn 2025 jyldyń 19 naýryzynda Kıýrasao quramasy qarsy kezdesýinde jasady. Qazirge deıin 6 oıyn ótkizip úlgerdi.

Óz qaqpasyna gol ótkizip alǵan belgııalyq fýtbolshylar tarazy basyn teńestirýge umtyldy. Oıyn tizginin kóbirek qolǵa ustaýǵa tyrysqan olar Temirlan Anarbekovti jıi mazalaı bastady. Dese de otandastarymyz oǵan moıyǵan joq. Qolaıly sátte alǵa qaraı umtylyp, jankúıerler kóńilinen shyǵatyn oıyn kórsetýge tyrysty. 

Ekinshi kezeńde belgııalyq qurama birden alǵa qaraı umtyldy. Oıynnyń 48-mınýtynda áriptesi Tımotı Kastannyń áýelete bergen pasyn Hans Vanaken golǵa aınaldyra bildi. Odan keıin de qarsylas qurama belsendiligin arttyra tústi. Kezdesý 1:1 esebimen etń aıaqtaldy.

Aıta ketsek, 2006 jylǵy Eýropa chempıonaty irikteý kezeńinde Belgııamen (0:0, 2:2) eki márte teń oınaǵan edi.

Oıynnyń 77-mınýtynda qazaqstandyq Islam Chesnokov dóreki áreketine baılanysty birden qyzyl qaǵaz alyp, alańnan qýyldy. Osylaısha Qazaqstan quramasy álem chempıonaty irikteý kezeńind oıyndaryn aıaqtady. Al Belgııa endi aldaǵy oıynyn 18 qarashada óz alańynda Lıhtenshteınge qarsy ótkizedi.

Qazirge deıin otandastarymyz Ýelsten eki márte (1:3, 0:1), Soltústik Makedonııadan (0:1), Belgııadan (0:6) esebimen jeńilip, Soltústik Makedonııamen (1:1) teń tússe, Lıhtenshteındi (4:0, 2:0) eki márte tize búktirdi.

Al Belgııa quramasy Soltústik Makedonııa eki márte (1:1, 0:0) teń oınasa, eki márte Ýelsten (4:3, 4:2), bir márte Lıhtenshteınnen (6:0), Qazaqstannan (6:0) basym tústi.

Búgin jeńiske jetken jaǵdaıda belgııalyq fýtbolshylar álem chempıonaty fınaldyq kezeńine joldamaǵa qol jetkizetin edi.