Álem chempıonatyna kelgen sheteldik juldyzdar qazaq eline aq tilegin joldady
ASTANA. KAZINFORM — Astanaǵa jarysqa kelgen álemdik sport juldyzdary qazaqstandyqtardy Respýblıka kúnimen quttyqtady, dep habarlaıdy elorda ákimdiginiń resmı saıty.
Astanaǵa kúres túrlerinen álem chempıonatyna kelgen Olımpıada chempıondary, álemdik sport juldyzdary, sheteldik jattyqtyrýshylar men halyqaralyq buqaralyq aqparat quraldarynyń ókilderi qazaqstandyqtardy 25 qazan kúni atap ótiletin ulttyq mereke — Respýblıka kúnimen quttyqtady.
Ataqty sportshylar merekelik beınequttyqtaý joldady. Qazaqstandyqtardy erkin kúresten álem chempıony Rızabek Aıtmuhan, Rıo-2016 Olımpıadasynyń chempıony, Tokıo Olımpıadasynyń kúmis júldegeri, erkin kúresten tórt dúrkin álem chempıony amerıkalyq Kaıl Snaıder, sondaı-aq grek-rım kúresinen Parıj-2024 Olımpıadasynyń chempıony, 23 jasqa deıingi sportshylar arasynda eki dúrkin álem chempıony Semen Novıkov quttyqtady.
Qazaqstandyq balýan Rızabek Aıtmuhan otandastaryn ulttyq merekemen quttyqtap, elimizge beıbitshilik pen amandyq tiledi.
— Barshańyzdy Respýblıka kúnimen shyn júrekten quttyqtaımyn! Sizderge zor densaýlyq, otbasylaryńyzǵa amandyq tileımin. Elimiz damyp, órkendeı bersin! — dedi álem chempıony Rızabek Aıtmuhan.
Al erkin kúresten tarıhtaǵy eń jas Olımpıada chempıony atanǵan amerıkalyq balýan Kaıl Snaıder elordada erekshe qarsy alǵan qazaqstandyqtarǵa alǵysyn bildirip, merekelik tilegin jetkizdi.
— Qazaqstan halqy, Respýblıka kúni qutty bolsyn! Astanada meni óte erekshe jyly qarsy aldy. Men Astanany jaqsy kóremin. Barshańyzǵa beıbitshilik, densaýlyq jáne amandyq tileımin! — dedi Kaıl Snaıder.
Óz kezeginde grek-rım kúresinen 87 kelige deıingi salmaqta Parıj-2024 Olımpıadasynyń chempıony Semen Novıkov te jyly lebizin bildirdi.
— Qazaqstan halqyn 25 qazan — Respýblıka kúnimen shyn júrekten quttyqtaımyn! Barshańyzǵa tek jaqsylyq, baqyt, zor densaýlyq, beıbitshilik jáne otbasylaryńyzǵa amandyq tileımin! — dedi Olımpıada chempıony.
Budan bólek, merekelik beınequttyqtaýǵa horvatııalyq jattyqtyrýshy Bojo Starchevıch, Mońǵolııa quramasynyń ókili Grant Ýord Terner, sondaı-aq amerıkalyq sport jýrnalısteri Endrıý Speı, Djonatan Kozak pen Mark Bader qatysyp, qazaqstandyqtarǵa izgi tilekterin joldady.
Sheteldik qonaqtar qazaqstandyqtardy Respýblıka kúnimen quttyqtap qana qoımaı, Astana qalasynan alǵan áserlerin de bólisti. Olar elordanyń sulýlyǵy men tazalyǵyn, qazaqstandyqtardyń qonaqjaılyǵyn erekshe atap ótti. Keıbir sheteldik qonaqtar Qazaqstan men onyń mádenıetine degen qurmetin bildirip, qazaq tilinde quttyqtaý sózderin jetkizdi.
Aıta keteıik, 24 qazan men 1 qarasha aralyǵynda elordadaǵy «Barys Arena» sport kesheninde kúres túrlerinen álem chempıonaty ótip jatyr. Bedeldi halyqaralyq jarysta 135 elden kelgen 900-ge jýyq sportshy jarys jolyna shyǵady.
Álemdik sport juldyzdary men sheteldik qonaqtardyń ulttyq merekege oraı joldaǵan quttyqtaýlary Qazaqstanǵa degen qurmetin aıshyqtap, elder arasyndaǵy dostyq pen halyqaralyq sporttyq baılanysty nyǵaıtýǵa yqpal etti.
Buǵan deıin Astananyń birneshe alańynda Respýblıka kúnine arnalǵan merekelik kontsertter ótip jatqanyn jazǵanbyz.
