Álem chempıonaty jartylaı fınalynyń juptary belgili boldy
ASTANA.KAZINFORM – 2026 jylǵy fýtboldan álem chempıonatynyń shırek fınaldyq kezdesýlerinde Anglııa quramasy Norvegııany qosymsha ýaqytta jeńse, Argentına Shveıtsarııadan basym túsip, jartylaı fınalǵa joldama aldy.
Anglııa – Norvegııa – 2:1
Norvegııa quramasy matchtaǵy esepti 36-mınýtta ashty. Sol qaptaldan uıymdastyrylǵan shabýyl kezinde Andreas Shelderýp birinshi taımdaǵy basymdyqty golǵa aınaldyryp, komandasyn alǵa shyǵardy.
Anglııa birinshi taımǵa qosylǵan ýaqytta tarazy basyn teńestirdi. Djýd Bellıngem jyldam shabýyldy dál soqqymen aıaqtap, esepti teńestirdi. Artynsha Garrı Keın de qarsylas qaqpasyn dál kózdegenimen, tóreshi ofsaıdqa baılanysty goldy esepke alǵan joq.
Úzilisten keıin Norvegııa ekinshi gol soǵýǵa óte jaqyn boldy. Buryshtamadan keıin Torborn Heggem qaqpany dál kózdegenimen, VAR júıesi Erlıng Holandtyń ereje buzǵanyn anyqtap, goldy joıdy. Keıin Krıstoffer Aıerdiń soqqysy qaqpa baǵanasyna tıip, aǵylshyndar eseptiń teń bolý múmkindigi saqtap qaldy.
Matchtyń taǵdyry qosymsha ýaqytta sheshildi. Norvegııa qaqpashysy Egıl Selvık Nıýland Morgan Rodjerstiń joıqyn soqqysyn qaıtarǵanymen, keri serpilgen dopqa alǵash bolyp jetken Djýd Bellıngem dýbl avtory atanyp, Anglııaǵa jeńis syılady.
Argentına – Shveıtsarııa – 3:1
Kezdesýdi belsendi bastaǵan Shveıtsarııa bolǵanymen, esepti alǵash bolyp Argentına ashty. Lıonel Messı oryndaǵan buryshtamadan keıin Aleksıs Mak Allıster baspen dál soqqy jasap, óz komandasyn alǵa shyǵardy.
Kóp uzamaı shveıtsarııalyqtar oıyn tizginin qolǵa aldy. Dan Ndoıeniń alǵashqy soqqysyn Lısandro Martınes bógese, ekinshisin qaqpashy Emılıano Martınes qaıtardy. Alaıda úshinshi múmkindikte Ndoıe esepti teńestirdi.
Oıynnyń sheshýshi sáti 72-mınýtta boldy. Brel Embolo sımýlıatsııa jasaǵany úshin ekinshi sary qaǵaz alyp, alańnan qýyldy.
Negizgi ýaqyttyń sońyna qaraı Lıonel Messı jeńis golyn soǵýǵa jaqyn boldy, alaıda onyń aıyp alańy syrtynan baǵyttaǵan soqqysy qaqpa baǵanasynyń janynan ótti.
Qosymsha ýaqytta Tıago Almadanyń soqqysy baǵanaǵa tıdi. Artynsha Hýlıan Alvares keremet soqqymen dopty qaqpaǵa toǵytyp, Argentınany qaıtadan alǵa shyǵardy. Matchtyń sońǵy núktesin Laýtaro Martınes qoıyp, argentınalyqtardyń jeńisin nyǵaıtty.
Jartylaı fınaldaǵy juptar
15 shildede AQSh-tyń Atlanta qalasyndaǵy Mercedes-Benz Stadium stadıonynda Anglııa men Argentına quramalary fınal joldamasyn sarapqa salady.
Al 14 shildede AQSh-tyń Tehas shtatyndaǵy Arlıngton qalasynda ornalasqan AT&T Stadium arenasynda Frantsııa men Ispanııa quramalary jartylaı fınalda kezdesedi.
Osylaısha, 2026 jylǵy fýtboldan álem chempıonatynyń jartylaı fınalyna Frantsııa, Ispanııa, Anglııa jáne Argentına quramalary joldama aldy.
Aıta keteıik, álem chempıonatynyń jartylaı fınalyndaǵy oıyndar qaı telearnadan kórsetiletinin jazǵanbyz.
