Álem chempıonaty: Shaǵyn fýtboldan Qazaqstan quramasy Úndistandy 16:0 esebimen jeńdi
Shaǵyn fýtboldan Qazaqstan quramasy Birikken Arab ámirliginiń Ras-el-Haım qalasynda ótip jatqan álem chempıonatynda ekinshi jeńisine qol jetkizdi, dep habarlaıdy Kazinform.
Álem chempıonatyna áýesqoı sportshylar qatysa alady.
El quramasy A tobynda synǵa túsedi. Qarsylastary - Gana, Úndistan jáne Birikken Arab ámirligi.
Búgingi oıynda qazaqstandyq sportshylar Úndistan quramasyn 16:0 esebimen tize búktirdi.
Kezdesý barysynda el quramasynan Nursultan Júsipov (9, 33 mınýt), Jánibek Seıitjan (12, 50+1), Ilıa Mýn (17, 32), Evgenıı Bırıýkov (20), Aslanbek Arshkenov (22), Baqtııar Jýshnov (24, 36, 44), Avel Tarjanov (27, 47), Bákir Dıqanbaev (36, 37), Oralbek Egizbaev (40) mergendik tanytty.
Alǵashqy týrda el quramasy Ganadan 7:0 esebimen basym tústi.
Endi Qazaqstan quramasy 30 qazanda Birikken Arab ámirligimen kezdesedi.
Álem chempıonatyna barlyǵy 32 komanda qatysyp jatyr. Quramalar segiz topqa bólingen. Árbir toptan eki quramadan pleı-off satysyna joldama alady.
Eske salsaq, 29 qazanda fýtboldan Premer-lıga komandalary arasyndaǵy el birinshiligi máresine jetti.
