Álem chempıonaty: semserlesýden áıelder quramasy komandalyq saıysty jeńispen bastady
ASTANA. KAZINFORM - Gonkong qalasynda ótip jatqan eresekter arasyndaǵy semserlesýden álem chempıonatynda áıelder arasynda komandalyq týrnır bastaldy, dep habarlaıdy QR Týrızm jáne sport mınıstrligi Sportty damytý dırektsııasynyń baspasóz qyzmeti.
16 úzdik komandanyń qataryna ený úshin ótken alǵashqy kezdesýde Irına Bakaldına, Sofııa Nıkolaıchýk, Vladıslava Andreeva men Darıa Samodelkınadan quralǵan Qazaqstan komandasy Shvetsııa komandasymen sheberlik baıqasty. Tartysty básekede bizdiń sportshylar erik-jiger tanytyp, 39:38 esebimen basym tústi.
Sonymen birge, qylysh baǵdarlamasynda erler arasynda da komandalyq syn ótip jatyr. TOP-16 qataryna ótý jolynda Qazaqstan sportshylary Qytaıǵa 29:45 esebimen ese jiberip, jarysty aıaqtady.
Endi shırek fınalǵa shyǵý úshin Qazaqstan áıelder quramasy Tokıo Olımpıadasynyń kúmis júldegeri ári osy álem chempıonatynda jekeleı synda top jarǵan Son Se Ra bastaǵan Ońtústik Koreıa komandasyna qarsy kezdesý ótkizedi. Jekpe-jek Qazaqstan ýaqytymen saǵat 09:30-ǵa josparlanǵan.
Osyǵan deıin semserlesýden Gonkongta ótip jatqan álem chempıonatynda Qazaqstan quramasy jekeleı syndardaǵy jarysyn aıaqtaǵany týraly jazdyq.
