Álem chempıonaty: Norvegııa fýtbol quramasy Italııany iri eseppen jeńdi

ASTANA. KAZINFORM — Fýtboldan 2026 jylǵy álem chempıonatynda Eýropa qurlyǵy boıynsha irikteý kezeńinde Norvegııa quramasy Italııany iri eseppen jeńdi.

Іrikteý kezeńinde І tobynda synǵa túsip jatqan Norvegııa óz alańynda Italııany qabyldady.

Oıyn barysynda norvegııalyq Aleksandr Serlot 14, Antonıo Nýsa 34, Erlıng Holand 42-mınýtta mergendik tanytty.

Osylaısha Norvegııa qarsylasyn 3:0 esebimen jeńdi. 

Atalǵan topta Estonııa óz alańynda Izraılge 1:3 esebimen ese jiberdi. 

Bul topta alǵashqy úsh týrda upaı joǵaltpaǵan Norvegııa 9 upaımen kósh basynda tursa, odan keıingi oryndaǵy Izraılde 6, Estonııada 3 upaı bar. Ázirge Italııa men Moldova birde-bir upaı ala alǵan joq. 

Sondaı-aq Qazaqstan quramasy baq synap jatqan J tobynda Ýels quramasy Lıhtenshteındi 3:0 esebimen jeńse, Soltústik Makedonııa men Belgııa 1:1 esebimen teń oınady. Bul týrǵa qazaqstandyq fýtbolshylar qatysqan joq.

Eki týrdan keıin 4 upaımen Soltústik Makedonııa men Ýels kósh basynda kele jatsa, Qazaqstan 3 upaı enshiledi. Al Lıhtenshteınniń upaı ala almasa, Belgııa alǵashqy oıynyn búgin ótkizedi.
Taǵy eki oıyn L tobynda ótti. Bul topta Gıbraltar quramasy Horvatııaǵa 1:7 esebimen ese jiberse, taǵy bir kezdesýde Chehııa quramasy Chernogorııany 2:0 esebimen súrindirdi.

Іrikteý kezeńi oıyndary búgin de jalǵasady.

Dúbirli dodada alǵash ret 48 qurama baq synaıdy. Onyń 16-sy Eýropa, 8-i Azııa, 9-y Afrıka, 6-aýy Soltústik Amerıka, 6-aýy Ońtústik Amerıka qurlyǵyna bólinse, 1-eýi muhıt aımaǵy elderine qaralǵan. Al 2 joldama pleı-off satysy arqyly anyqtalady.

Aıta ketsek, fýtboldan álem chempıonatyna shyqqan quramalar sany 10-ǵa jetti.

Qazirge deıin AQSh, Kanada, Meksıka, Japonııa, Jańa Zelandııa, Iran, Argentına, Iordanııa, Ózbekstan, Ońtústik Koreıa quramalary 2026 jylǵy álem chempıonatyna qatysatyny belgili boldy.