Álem chempıonaty: Krıshtıaný Ronaldý jańa rekord ornatty

ASTANA. KAZINFORM – Portýgalııa quramasy 2026 jylǵy álem chempıonatynyń Eýropa aımaǵyndaǵy irikteý kezeńiniń 4-týry aıasynda Vengrııamen teń oınady, dep habarlady Championat.com.

Oıyn Lıssabon qalasyndaǵy «Joze Alvalade» stadıonynda ótip, esep 2:2 nátıjesimen aıaqtaldy.

Portýgalııa sapynan 40 jastaǵy Krıshtıaný Ronaldý dýbl jasap, 22 jáne 45+3 mınýttarda gol soqty. Bul shabýylshynyń mansabyndaǵy 947 jáne 948-shi goldary bolyp tirkeldi. Sonymen qatar Ronaldý álem chempıonatynyń irikteý matchtarynda barlyǵy 41 gol soǵyp, jańa rekord ornatty.

Vengrııa quramasynan Adam Salaı 8-mınýtta, al Domınık Soboslaı 90+1 mınýtta mergendik tanytty.

Roberto Martınes jattyqtyratyn Portýgalııa 10 upaı jınap, E tobynyń kóshin bastap tur. Al Marko Rossı baptaıtyn Vengrııa 5 upaımen ekinshi orynda keledi.

Kelesi týrda, 13 qarasha kúni Portýgalııa Irlandııaǵa qonaqqa barady, al Vengrııa Armenııamen syrt alańda kezdesedi.

Aıta keteıik, qazirgi álem chempıony – Argentına quramasy. Olar 2022 jylǵy álem chempıonatynyń fınalynda Frantsııamen kezdesip, negizgi ýaqyt 3:3 esebimen teń aıaqtaldy. Penaltı serııasynda Argentına 4:2 esebimen jeńiske jetti.

Buǵan deıin fýtboldan 2026 jylǵy álem chempıonatynyń irikteý kezeńinde Qazaqstan quramasy kezekti oıynyn Soltústik Makedonııaǵa qarsy ótkizip, 1:1 esebimen teń túskenin habarlaǵanbyz.