Álem chempıonaty: Qazaqstandyq hokkeıshiler Germanııaǵa ese jiberdi

ASTANA. KAZINFORM — Shaıbaly hokkeıden Qazaqstan quramasy 2025 jylǵy álem chempıonaty elıtalyq dıvızıonyndaǵy ekinshi oıynyn búgin Germanııaǵa qarsy ótkizdi.

Álem chempıonatynda Qazaqstan quramasy V tobynda oınaıdy.

Qarsylastary — Fınlıandııa, Chehııa, AQSh, Germanııa, Danııa, Norvegııa jáne Majarstan. Oıyndar Danııanyń Hernıng qalasynda ótip jatyr.

Eki qurama buǵan deıin bes márte sheberlik baıqasty. Onyń bireýinde qazaqstandyq hokkeıshiler jeńiske jetse, qalǵanynda qarsylasyna ese jiberdi. 

Birinshi kezeńde qazaqstandyq hokkeıshiler alǵashqy bolyp esep ashty. Shabýylshy Nıkıta Mıhaılıs 3-mınýtta kózdegen nysanadan múlt ketken joq. 

Al 13-mınýtta Maksımılıan Kastner tarazy basyn teńestirse, Voıtseh Stahovıak 34-mınýtta Germanııany alǵa shyǵardy. Odan keıin Lýkas Raıhel 41, Lýkas Kelble 45-mınýtta basymdyqty arttyra tústi.

Osylaısha Qazaqstan quramasy qarsylasyna 1:4 esebimen ese jiberdi.

Taǵy bir oıynda A tobynda Kanada quramasy Latvııany 7:1 esebimen jeńdi.

Endi qazaqstandyq hokkeıshiler 13 mamyrda saǵat 23:20–da Majarstan quramasymen kezdesse, Germanııa kelesi oıynyn sol kúni Norvegııaǵa qarsy ótkizedi. 

Sondaı-aq búgin V tobynda AQSh quramasy Vengrııany 6:0 esebimen oısyrata jeńse, A tobynda oınaıtyn Slovakııa hokkeıshileri Slovenııany 3:1 esebimen tize búktirdi.

Endi 23:20–da V tobynda Norvegııa men Chehııa, A tobynda Fınlıandııa men Frantsııa sheberlik baıqasady.