Álem chempıonaty: Qazaqstan men Ýels kezdesýi qaı telearnadan kórsetiledi

ASTANA. KAZINFORM — 2026 jylǵy álem chempıonaty irikteý satysyndaǵy Qazaqstan men Ýels kezdesýi qaı telearnadan kórsetiletini belgili boldy.

Bul oıyn naýryzdyń 22-nen 23-ne qaraǵan túni qazaqstandyq ýaqytpen 00:45–te «Qazsport» telearnasynan tikeleı efırde kórsetiledi.

Kezdesý Ýels astanasy — Kardıff qalasynda bolady.

El quramasy 2026 jylǵy Álem chempıonatyna irikteý kezeńinde J tobynda oıyn kórsetedi.
Qarsylastary — Belgııa, Ýels, Soltústik Makedonııa jáne Lıhtenshteın.
Matchtar 2025 jyldyń naýryzynda bastalyp, qarasha aıynda aıaqtalady.

Aıta ketsek, Qazaqstan quramasy 22 naýryzda syrt alańda Ýelspen kezdesse, 25 naýryzda Lıhtenshteınge qarsy oınaıdy.

Budan buryn habarlaǵanymyzdaı, Túrkııanyń «Beshıktash» klýbynda oınaıtyn jartylaı qorǵaýshy Baqtıer Zaınýtdınovtyń jaraqaty bar. Endi ol qosymsha medıtsınalyq qaralymnan ótip, naqty sheshim qabyldanady.

Al Ramazan Kárimov pen Roman Asrankýlov alǵan jaraqatyna baılanysty oqý-jattyǵý jıynyna qatyspaıdy.