Álem chempıonaty: Qazaqstan quramasy Belgııadan iri eseppen jeńildi
ASTANA. KAZINFORM - Búgin fýtboldan Qazaqstan quramasy 2026 jylǵy álem chempıonaty irikteý kezeńindegi besinshi oıynynda Belgııadan jeńilip qaldy.
Qazaqstan quramasynyń bas bapkeri Alı Alıev Ýelspen oıynnan keıin negizgi quramda birqatar ózgeris jasady. Qaqpashy Temirlan Anarbekovti áriptesi Muhammedjan Seısen almastyrdy. Sondaı-aq Ular Jaqsybaev, Serikjan Mýjıkov, Sultanbek Astanov, Oralhan Ómirtaev negizgi quramda jasyl alańǵa shyqty.
Al bas bapker ótken oıynnan keıin ıAn Vorogovskıı, Álibek Kasym, Nuraly Álip, Ramazan Orazov, Ǵalymjan Kenjebekke taǵy da senim artty.
Quramalar J tobynda synǵa túsip jatyr. Qazirge deıin 4 oıynnan keıin Ýels quramasy 10 upaımen birinshi orynda tursa, odan keıingi oryndardaǵy Soltústik Makedonııanyń 8, Belgııanyń 7, Qazaqstannyń 3 upaıy bar. Ázirge Lıhtenshteınniń qorjyny bos.
Kezdesý barysynda alǵashqy mınýttan belgııalyq fýtbolshylar belsendi qımyl kórsetti. Olar Qazaqstan quramasy qaqpasy mańynda jıi boı kórsetip, gol soǵatyn múmkindikti izdedi. Oǵan qazaqstandyq qorǵaýshylar men qaqpashy Muhammedjan Seısen laıyqty tótep bere bildi.
Dese belgııalyq quramadan birinshi kezeńde Kevın de Breıne 42, Jeremı Dokıý 44-mınýtta qaqpadan sańylaý taýyp, basymdyqty eki golǵa arttyrdy.
Ekinshi kezeńde de belgııalyq fýtbolshylar qarqynyn báseńdetken joq. Olardyń qatarynan Nıkolas Raskın 52-mınýtta gol soqsa, odan keıin Jeremı Doký 60, Kevın De Breıne 84-mınýtta ózderiniń atalǵan oıyndaǵy ekinshi golyn soqty.
Al olardyń áriptesi Tomas Mene 87-mınýtta qorytyndy esepti belgiledi. Osylaısha Qazaqstan quramasy qarsylasyna 0:6 esebimen jeńilip qaldy.
Búgingi jeńisinen keıin Belgııa quramasy ekinshi orynǵa kóterildi. Týrnır kestesinde kósh basynda Soltústik Makedonııa 11 upaımen keledi. Al úshinshi Ýels 10 upaıdy enshilese, Qazaqstan quramasynda 3 upaı bar. Ázirge Lıhtenshteıniń qorjyny bos.
Sondaı-aq búgin atalǵan topta Soltústik Makedonııa quramasy Lıhtenshteındi 5:0 esebimen tize búktirdi.
Endi bul toptaǵy oıyndar 10 qazanda ótkiziledi. Bul kúni Qazaqstan quramasy Lıhtenshteındi qabyldasa, Belgııa men Soltústik Makedonııa ózara sheberlik baıqasady.