Álem chempıonaty: Qazaqstan hokkeı quramasy Germanııaǵa jol berdi

ASTANA. KAZINFORM - Búgin, 17 mamyrda shaıbaly hokkeıden álem chempıonaty elıtalyq dıvızıonynda Qazaqstan quramasy besinshi kezdesýinde Germanııaǵa qarsy oınady.

Qazaqstandyq hokkeıshiler elıtalyq dıvızıondaǵy ornyn saqtap qalý úshin árbir kezdesýde jeńiske jetýge bar kúshin salatyn anyq edi. Bul oraıda Germanııanyń ortanqol ujym sanalatyny belgili. Sondyqtan búgingi kezdesýde el quramasy upaı qoryn molaıtýǵa kúsh salatyny anyq bolatyn.

Alǵashqy kezeńde qarsylastar sapynan Maksımılıan Shýber 1, Parker Týomı 2-mınýtta mergendik tanytsa, oǵan qazaqstandyq Roman Starchenko 7-mınýtta bir golmen jaýap qaıyrdy.

Ekinshi kezeńde Germanııa quramasynan Djon-Djeıson Peterka 21, Lýkas Raıhel 28, Lýkas Kelbl 35-mınýtta úsh shaıba soǵyp ketti.

Úshinshi kezeńde de germanııalyq hokkeıshilerdiń qarqyny báseńdegen joq. Olardyń qatarynan Lýkas Raıhel 50, Frederık Tıffels 54, Maksımılıan Kastner 58-mınýtta gol soqsa, qazaqstandyq Artem Korolev 51-mınýtta kózdegen nysanadan múlt ketken joq.

Osylaısha el quramasy qarsylasyna 2:8 esebimen jol berdi.

Aıta ketsek, budan buryn qazaqstandyq hokkeıshiler Frantsııany 3:1 esebimen jeńse, Slovakııaǵa 2:6, Latvııaǵa 0:2, Shvetsııaǵa 1:3 esebimen ese jiberdi.

Endi el quramasy 19 mamyrda AQSh, 20 mamyrda Polsha hokkeıshilerimen sheberlik baıqasady.