Álem chempıonaty: Qazaqstan hokkeı quramasy AQSh-tan oısyraı jeńildi

ASTANA. KAZINFORM - Búgin, 19 mamyrda shaıbaly hokkeıden álem chempıonaty elıtalyq dıvızıonynda Qazaqstan quramasy altynshy oıynyn AQSh-qa qarsy ótkizdi.

Amerıkalyq hokkeıshiler myqty quramanyń biri sanalady. Qazirge deıin eki qurama alty márte kezdesse, qazaqstandyqtar barlyǵynda qarsylasyna ese jiberip qoıdy.

Búgingi kezdesýde de AQSh quramasy birden oıyn tizginin óz qolyna alýǵa tyrysty. Alǵashqy eki kezeńde olar Nıkıta Boıarkın qorǵaǵan qaqpaǵa jaýapsyz jeti shaıba soǵyp ketti. Olardyń qatarynan Mett Boldı 4, 23, Bredı Tkachýk 7, 18. Brok Nelson 16, Gevın Brındlı 21, Lıýk Kanın 31-mınýtta qaqpadan sańylaý tapty.

Úshinshi kezeńde AQSh quramasynan Bredı Tkachýk 45, Kevın Heız 46, Djonnı Godro 50-mınýtta gol soqsa, oǵan qazaqstandyq Álıhan Ómirbekov 47-mınýtta bir shaıbamen jaýap berdi.

Osylaısha Qazaqstan quramasy qarsylasyna 1:10 esebimen ese jiberdi.

Chehııanyń Praga jáne Ostrava qalalarynda ótip jatqan álem chempıonatynda qazaqstandyq hokkeıshiler V tobynda Frantsııa, Slovakııa, Latvııa, Shvetsııa, Germanııa, AQSh jáne Polshamen synǵa túsip jatyr.

Odan keıin el quramasy 20 mamyrda Polsha hokkeıshilerimen sheberlik baıqasady.

Aıta ketsek, budan buryn qazaqstandyq hokkeıshiler Frantsııany 3:1 esebimen jeńse, Slovakııaǵa 2:6, Latvııaǵa 0:2, Shvetsııaǵa 1:3, Germanııaǵa 2:8 esebimen ese jiberdi.

Álem chempıonaty 26 mamyrda máresine jetedi.