Álem chempıonaty: Qazaqstan atynan júzý sportynan kimder qatysady

ASTANA. KAZINFORM — Sıngapýrde ótetin sý sporty túrlerinen álem chempıonatynda júzýden elimizdiń atynan kimder synǵa túsetini belgili boldy.

Álemdik dodada bıylǵy jyldyń negizgi sporttyq oqıǵasynyń birine baǵalanady. Bedeldi báseke alǵash ret Sıngapýrde jalaýyn kóterdi. Onda 6 sport túrinen 77 júlde jıyntyǵy sarapqa salynady. Olardyń qatarynda sýǵa júzý, ashyq sýda júzý, sınhrondy júzý, sýǵa sekirý, haı-daıvıng, sý doby sporty bar. Onda 100-den astam elden 2500-deı sportshy saıysqa túsedi.

Sý sportynan eń kóp 42 júlde jıyntyǵy sarapqa salynady. Bul básekede júzýden elimizdiń atynan 6 sportshy júldege talasady.

Aıta ketsek, álem chempıonatyna tek arnaıy normatıvterdi oryndaǵan júzýshiler ǵana joldama aldy. 

Qazaqstandyq sportshylardyń tizimi:

Ádilbek Mýsın (50 metr batterflıaı)
Ksenııa Ignatova (100 metrge shalqalaı júzý)
Adelaıda Pchelıntseva (50 metrge brass ádisimen júzý)
Sofıa Spodarenko (50 metrge batterflıaı ádisimen júzý)
Arsen Qojahmetov (50 metrge brass ádisimen júzý)
Gleb Kovalenıa (50 metrge shalqalaı júzý).

2023 jyly sınhrondy júzýden Edýard Kım qola alsa, byltyr elimizdiń atynan qatysqan Nargıza Bolatova men Edýard Kım kórkem júzýden aralas saıysta jeńis tuǵyryna kóterildi. 

Álem chempıonaty 3 tamyz kúni máresine jetedi. 

Eske salsaq, budan buryn Qazaqstannyń sý sporty túrleri federatsııasynyń bas hatshysy qyzmetine júzýden Olımpıada chempıony Dmıtrıı Balandın taǵaıyndaldy.