Álem chempıonaty: Karına Ibragımova alǵashqy jekpe-jegin sátti ótkizdi

ASTANA. KAZINFORM - Qazaqstandyq boksshy Karına Ibragımova (57 keli) áıelder arasyndaǵy álem chempıonatynyń shırek fınalyna shyqty.

Serbııanyń Nısh qalasynda ótip jatqan áıelder arasyndaǵy álem chempıonatynyń tórtinshi jarys kúni, 12 naýryzda qazaqstandyq boksshy kolýmbııalyq Valerııa Mendosany aıqyn basymdyqpen jeńdi. 

Endi el quramasynan kúndizgi sessııada Nadejda Rıabets (75 keli) Serra-Leone ókili Koromamen sharshy alańǵa shyǵady.

Al Natalıa Bogdanova (70 keli) keshki sessııada ıspanııalyq Mas Martınezben qolǵap túıistiredi.

Búgin buǵan deıin Nazym Qyzaıbaı (48 keli) jarysty jalǵastyrýǵa múmkindik aldy.

Aıta ketsek, budan buryn Alýa Balqybekova (50 keli), Jaına Shekerbekova (54 keli), Vıktorııa Grafeeva (60 keli), Aıda Ábikeeva (63 keli), Jasmın Qızatova (66 keli) ¼ fınalǵa joldama aldy.

Sondaı-aq Eldana Tálipova (81 keliden joǵary) endi 13 naýryz kúni serbııalyq Sara Mılkovıchpen kezdesedi.